រដ្ឋបាលខេត្តព្រះសីហនុ បន្តទទួលជំនួយបរិក្ខាពេទ្យពីក្រុមហ៊ុនជាតិ-អន្តរជាតិ ដើម្បីប្រយុទ្ធប្រឆាំងជំងឺកូវីដ-១៩

ខេត្តព្រះសីហនុ៖ លោក គួច ចំរើន អភិបាលខេត្តព្រះសីហនុ បានថ្លែងអំណរគុណ ចំពោះទឹកចិត្តសប្បុរសធម៌ របស់តំណាងក្រុមហ៊ុនជាតិ-អន្តរជាតិមួយចំនួន ដែលបានបន្តនាំយកសម្ភារបរិក្ខាពេទ្យ និងថវិកា មកផ្តល់ជូនរដ្ឋបាលខេត្តព្រះសីហនុ ដើម្បីរួមចំណែក ក្នុងការងារប្រយុទ្ធប្រឆាំងជំងឺកូវីដ-១៩ នៅក្នុងមូលដ្ឋានជាប់ឆ្នេរសមុទ្រមួយនេះ។

លោក គួច ចំរើន ថ្លែងអំណរគុណដូច្នេះ បានធ្វើឡើងកាលពីព្រឹកថ្ងៃចន្ទ ទី២៧ ខែមេសា ឆ្នាំ២០២០ នាឱកាសទទួលជំនួយមនុស្សធម៌ពីតំណាងក្រុមហ៊ុន​ JIANG SU CHANG ZHOU SHUN DE GROUP CO.LTD ដែលបាននាំយកម៉ាស់ចំនួន​ ២០.០០០​សន្លឹក, សម្លៀកបំពាក់​ពេទ្យ​ ៣០០ឈុត​ និងស្រោមដៃពេទ្យ​ ១.០០០​គូ មកផ្តល់ជូនរដ្ឋបាលខេត្តព្រះសីហនុ ទុកសម្រាប់បម្រើការងារទប់ស្កាត់ជំងឺកូវីដ-១៩។

ដោយឡែកនៅថ្ងៃដដែលនេះដែរ លោក​ សាន​ ហេង​ អគ្គនាយក​ក្រុម​ហ៊ុន​​ ហេង​ សម្បត្តិ​ និងលោកស្រី​ បានឧបត្ថម្ភថវិកា​ចំនួន​ ១៥.០០០$​ (​មួយ​មុឺនប្រាំពាន់ដុល្លា​រអាមេរិក)​ មកផ្តល់ជូនរដ្ឋបាលខេត្តនេះ ដេីម្បីបំរើឱ្យការងារប្រយុទ្ធប្រឆាំងជំងឺកូវីដ-១៩ នៅខេត្តព្រះសីហនុ៕ ដោយ៖ ដែន សីមា

អត្ថបទដែលជាប់ទាក់ទង