​ពលករខ្មែរធ្វើការនៅប្រទេសថៃជិត ១០នាក់​​រងរបួសធ្ងន់ ដោយសារសំណង់ស្ពានអាកាស​បាក់សង្កត់ពីលើ

ប្រទេសថៃ៖ អាជ្ញាធរកម្ពុជា បានឱ្យដឹងថា យ៉ាងហោចណាស់ពលករខ្មែរជិត ១០នាក់ បានរងរបួសធ្ងន់ និងស្រាល បណ្តាលមកពីសារសំណង់ស្ពានអាកាសនៅប្រទេសថៃ បានបាក់ស្រុតសង្កត់ពីលើពួកគេ។

អ្នកនាំពាក្យក្រសួងការងារ លោក ហេង សួរ ប្រាប់វីអូឌី តាមតេឡេក្រាម នៅថ្ងៃទី២៤ ខែមករា ឆ្នាំ​២០២១នេះថា បើតាមព័ត៌មានបឋម ការដ្ឋានសាងសង់ស្ពានអាកាសនៅប្រទេសថៃ ស្ថិតនៅបរិវេណផ្លូវសុរៈណារ៉ាយ ឃុំឃោកស៊ូង ស្រុកមឿងនគររាជសីមា ខេត្តនគររាជសីមា បានបាក់ស្រុតសង្កត់ពីលើពលករខ្មែរចំនួន ០៧នាក់។ ក្នុងនោះមានស្រី ០៣នាក់ និងប្រុស ០៤នាក់ កាលពីវេលាម៉ោង ១៤:១៨នាទី ថ្ងៃទី២៣ ខែមករា ឆ្នាំ​២០២១។

លោក ហេង សួរ បន្តថា ក្នុងចំណោមពលករ ០៧នាក់ ដែលរងរបួសនោះ មានចំនួន ០២នាក់ រងរបួសធ្ងន់នៅត្រង់ជើង ហើយពេលនេះ ជនរងគ្រោះកំពុងសម្រាកព្យាបាលនៅមន្ទីរពេទ្យមហារ៉ាត នគររាជសីមា។

ទាក់ទិនបញ្ហានេះ លោក កុយ គួង អ្នកនាំពាក្រក្រសួងការបរទេសកម្ពុជា ​មានប្រសាសន៍ស្រដៀងនឹងលោក ហេង សួរ ដែរ ប៉ុន្តែលោកថា អាជ្ញាធរនិងអ្នកពាក់ព័ន្ធ កំពុងស្វែងរករុករកមនុស្សបន្ថែមទៀត ខ្លាចមានអ្នកជាប់នៅ ក្នុងគំនរសំណង់បាក់ទាំងនោះ។

ជាងនេះទៀត លោក កុយ គួង បញ្ជាក់ថា ស្ថានទូតកម្ពុជា ប្រចាំប្រទេសថៃ ក៏កំពុងធ្វើការជាមួយអាជ្ញាធរថៃ ដើម្បីយកអំណោយជាប្រាក់ និងសម្ភារៈមួយចំនួន ទៅជូនជនរងគ្រោះនៅថ្ងៃស្អែកផងដែរ។

​របាយការណ៍ របស់ក្រសួងការងារ គិតត្រឹមឆ្នាំ២០១៨ ពលករខ្មែរដែលចេញទៅធ្វើការនៅប្រទេសថៃ មានប្រមាណ ១លាន ១សែននាក់ តែមិនបានបញ្ជាក់ពីចំនួនពលករធ្វើការខុសច្បាប់ទេ។

យ៉ាងនេះក្តី បើតាមការអះអាង របស់ លោក មឿន តុលា ប្រធានមជ្ឈមណ្ឌលសម្ព័ន្ធភាពការងារនិងសិទ្ធិមនុស្ស CANTRAL បញ្ជាក់ថា ពលករខ្មែរ ដែលធ្វើការខុសច្បាប់នៅប្រទេសថៃ អាចមានប្រមាណ​ ២០ម៉ឺននាក់៕​

ប្រភព៖ វីអូឌី

អត្ថបទដែលជាប់ទាក់ទង