លោក ហ៊ុន ម៉ាណែត ​បដិសេធ​មិនបានឲ្យជំនួយការ​ ទាក់ទងទៅមេបញ្ជាការកងទ័ព ដើម្បីរកលុយនោះទេ

រាជធានីភ្នំពេញ៖ ​​លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោពលខេមរភូមិន្ទ មេបញ្ជាការកងទ័ពជើងគោក បានបដិសេធ​នៅក្នុងសារសំឡេង ដែលត្រូវបានគេចែករំលែកតាមបណ្តាញសង្គម នៅថ្ងៃទី​២៤ ខែមេសា ឆ្នាំ​២០២១នេះថា រូបលោកមិនបាន​ប្រើ​ឲ្យជំនួយណាម្នាក់ តេទូរស័ព្ទទាក់ទងទៅមេបញ្ជាការកងទ័ព និងថ្នាក់ដឹកនាំ ដើម្បីសុំលុយ​នោះទេ។

ការបដិសេធ​នេះ បានឡើងក្រោយពីមានបុរសម្នាក់ ឈ្មោះ (ភាព) បានក្លែងបន្លំថា ជាជំនួយការ របស់ លោក ហ៊ុន ម៉ាណែត​ ហើយបានខល​ទាក់ទងសុំលុយ​ មេបញ្ជាការអាវុធហត្ថខេត្តកំពង់ធំ និងខេត្ត​កំពង់ចាម ដោយប្រើប្រាស់​លេខទូរស័ព្ឌ៖ 067 349 466។​

ក្នុងសារ​ជាសំឡេងផ្ញើជូន​ មេបបញ្ជាការយោធភូមិភាគ មេបញ្ជាការ​កងពល និងអង្គភាពទាំងអស់ លោក ហ៊ុន ម៉ាណែត បានបញ្ជាក់ថា «នៅថ្ងៃនេះ មាន​ករណីមួយ មានម្នាក់ឈ្មោះ ភាព មានលេខទូរស័ព្ទខាងលើ បានទូរស័ព្ទទាក់ទងបណ្តាថ្នាក់ដឹក​នាំ បណ្តាអង្គភាពមួយចំនួន​ ទាំងទ័ព ទាំងអាវុធហត្ថ ដោយថា​ ជាជំនួយការរបស់ខ្ញុំ ហើយសុំលុយ។ អ៊ីចឹង សូមបញ្ជាក់ថា មិនមែនជាជំនួយការរបស់ខ្ញុំទេ។ សូមជួយ​បញ្ជូន​ព័ត៌មានបន្ត ទៅមេបញ្ជាការ​កងរាជអាវុធហត្ថ ឬកងនគរបាលជាតិ ឬនរណាទាំងអស់ បើសិនជាមានអ្នកណាទាក់ទងទៅ គឺមិនមាននោះទេ។ មិនមែនជាជំនួយការរបស់ខ្ញុំទេ។ ខ្ញុំបានឲ្យជំនាញរបស់ប៉ូលិស កំពុងស្រាវជ្រាវនូវមុខសញ្ញានេះ​ហើយ»៕

អត្ថបទដែលជាប់ទាក់ទង