អភិបាលស្រុកបន្ទាយស្រី​៖«ផ្សារក្រមួនព្រះដាក់» ​បន្តបើកដំណើរការ​ក្នុងសហគមន៍នេះ តាមបែបគន្លងថ្មី

ខេត្តសៀមរាប៖ អភិបាលស្រុកបន្ទាយស្រី លោក ឃឹម ហ្វីណង់ បានបង្ហោះសារនៅក្នុងបណ្តាញសង្គមផ្ទាល់ខ្លួន របស់លោក នៅថ្ងៃអាទិត្យ ទី​០៥ ខែកញ្ញា ឆ្នាំ​២០២១នេះថា «ផ្សារក្រមួនព្រះដាក់» នៅតែបន្តបម្រើឱ្យពុកម៉ែបងប្អូន នៅក្នុងសហគមន៍តាមបែបគន្លងថ្មី ប្រកបដោយសុវត្ថិភាពខ្ពស់ និងភាពងាយស្រួល។ សូម្បីតែអ្នកទេសចរ ក៏ត្រូវបានគេសង្កេតឃើញមានវត្តមានដើរលេង នៅក្នុងផ្សារជនបទមួយនេះដែរ។

លោកអភិបាលបន្តថា ការរៀនរស់នៅតាមបែបគន្លងថ្មី និងការប្រយត្ន័ប្រយែងខ្ពស់ ទៅលើបញ្ហាសុវត្ថិភាព នឹងក្លាយទៅជារឿង ដែលយើងត្រូវធ្វើជាប្រចាំ និងជាទម្លាប់ហើយ មិនមែនគ្រាន់តែធ្វើម្តងម្កាល ឬធ្វើតែពេល ដែលគេនាំគ្នាផ្អើលនោះមួយភ្លែតៗនោះទេ។

បន្ថែមលើនេះ លោក ឃឹម ហ្វីណង់ អភិបាលស្រុកបន្ទាយស្រី ក៏បានក្រើនរំលឹកដល់បងប្អូនប្រជាពលរដ្ឋទាំងអស់ ត្រូវបន្តអនុវត្តវិធានសុវត្ថិភាព ៣ការពារ និង៣កុំ ព្រមទាំងចាក់វ៉ាក់សាំងការពារជំងឺកូវីដ-១៩ ឱ្យបានគ្រប់ៗគ្នា ដើម្បីសុវត្ថិភាពខ្លួនយើង ក្រុមគ្រួសារយើង និងសហគមន៍យើងទាំងអស់គ្នា៕

អត្ថបទដែលជាប់ទាក់ទង