កងរាជអាវុធហត្ថខេត្តព្រះសីហនុ បញ្ជូនជនសង្ស័យ៥នាក់ ទៅ​តុលាការផ្តន្ទាទោស ពាក់ព័ន្ធករណីគ្រឿងញៀន

ខេត្តព្រះសីហនុ៖ មន្រ្តីកងរាជអាវុធហត្ថខេត្តព្រះសីហនុ បានឱ្យដឹងថា នៅព្រឹក ថ្ងៃទី២៥ ខែវិច្ឆិកា ឆ្នាំ២០២១នេះ កម្លាំងការិយាល័យប្រឆាំងគ្រឿងញៀន បានបញ្ជូនជនសង្ស័យចំនួន ០៥នាក់ រួមជាមួយវត្ថុតាងមួយចំនួនទៀត ទៅកាន់សាលាដំបូងខេត្តព្រះសីហនុ ដើម្បីផ្តន្ទាទោស ពាក់ព័ន្ធករណីជួញដូរខុសច្បាប់ នូវសារធាតុញៀន។

សមត្ថកិច្ច បន្តថា ​ជនសង្ស័យទាំង ០៥នាក់ បានប្រព្រឹត្តបទល្មើស​ចំនួន ០៣ករណី ដាច់ដោយឡែកពីគ្នា រួមមានករណីទី០១ កម្លាំងជំនាញ បានឃាត់ខ្លួន​ជនសង្ស័យម្នាក់ ​ឈ្មោះ យ៉ាន់ រ៉ាក់ ភេទប្រុស អាយុ ២៥ឆ្នាំ មុខរបរកម្មករសំណង់ ស្នាក់នៅបន្ទប់ជួល ស្តិតក្រុម១៤ ភូមិ១ សង្កាត់លេខ១ ក្រុង-ខេត្តព្រះសីហនុ។

​ពេលឃាត់ខ្លួនជនសង្ស័យ សមត្ថកិច្ច បានដកហូតវត្ថុតាង​ ម្សៅសថ្លា ០២កញ្ចប់តូច (ទម្ងន់0.៣៨g), ទូរស័ព្ទដៃ ១គ្រឿង, និងលុយ ៤៥,០០០រៀល។  ​ជនសង្ស័យរូបនេះ ត្រូវសមត្ថកិច្ចឃាត់ខ្លួន នៅ​ម៉ោង ១៧ និង៣០នាទីល្ងាច ថ្ងៃទី២៣ ខែវិច្ឆិកា ឆ្នាំ២០២១ ​នៅចំណុចបុរីសុខឃាង ស្ថិតក្រុម១៤ ភូមិ១ សង្កាត់លេខ១ ក្រុង-ខេត្តព្រះសីហនុ។

ករណីទី០២ កម្លាំងកងរាជអាវុធហត្ថខេត្តព្រះសីហនុ បានឃាត់ខ្លួនជនសង្ស័យចំនួន​ ០២នាក់​ទៀត ​ឈ្មោះ អ៊ុត ប្រែម ភេទប្រុស អាយុ ២៧ឆ្នាំ  និងឈ្មោះ ទី ញ៉េន ភេទប្រុស អាយុ ៣២ឆ្នាំ។ ហើយជនសង្ស័យទាំង ០២នាក់នេះ មានមុខរបបើកបរ ស្នាក់នៅក្រុម៦ ភូមិ១ សង្កាត់លេខ១ ក្រុង-ខេត្តព្រះសីហនុ ដូចគ្នា។

នៅពេលឃាត់ខ្លួន​ សមត្ថកិច្ច បានដកហូតវត្ថុតាង​ម្សៅសថ្លា ១កញ្ចប់តូច (ទម្ងន់ ០.៥៩g), ខ្សៀជក់១, ទូរស័ព្ទដៃចំនួន ២គ្រឿង, និងថវិកា ១០មុឺនរៀល។

​ជនសង្ស័យទាំង ០២នាក់​នេះ​ សមត្ថកិច្ច បានឃាត់ខ្លួន នៅម៉ោង ១២ និង៤៥នាទី​ថ្ងៃត្រង់ ថ្ងៃទី២៣ ខែវិច្ឆិកា ឆ្នាំ២០២១ ​នៅចំណុចផ្លូវចូលរវៈ ៨០ចាស់ ស្ថិតក្រុម៦ ភូមិ១ សង្កាត់លេខ១ ក្រុង-ខេត្តព្រះសីហនុ។

ចំណែកករណីទី០៣ កម្លាំងកងរាជអាវុធហត្ថខេត្តព្រះសីហនុ បានឃាត់ខ្លួនជនសង្ស័យ ​០២នាក់ទៀត រួមមាន៖ ឈ្មោះ ស៊ុន សុផានិត ហៅឆ្លូញ ភេទប្រុស អាយុ ១៧ឆ្នាំ ​មុខរបរ​មិនពិតប្រាកដ មានទី លំនៅបច្ចុប្បន្ន (ពេជ្រ និល ) ភូមិ​លេខ​៦ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ​​ និងឈ្មោះ សុឹម សុភា ហៅអាវ៉េវ ភេទប្រុស អាយុ ១៧ឆ្នាំ មានមុខ​របរ​ធ្វើ​ការផ្លូវល្បឿន មានទី លំនៅ​បច្ចុប្បន្ន (ពេជ្រ និល ) ភូមិ​លេខ​៦ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ​។

នៅពេលឃាត់ខ្លួន​ជនសង្ស័យ សមត្ថកិច្ច បានដកហូតវត្ថុតាង​រួមមាន៖ ម្សៅសថ្លា ០៥កញ្ចប់ (ទម្ងន់២,១៥g), ដែកកេះ ១, កាំបិត ១, ទូរស័ព្ទចំនួន ២គ្រឿង , ម៉ូតូ ម៉ាក Today ១គ្រឿង, និងប្រាក់​រៀល ១០០.០០០រៀល។ ហើយបានឃាត់ខ្លួន កាលពីវេលាម៉ោង ១២ និង៣៥នាទី​ថ្ងៃត្រង់ ថ្ងៃ​ទី​២៣ ខែ​វិច្ឆិកា ឆ្នាំ​២០២១ ដោយ​កម្លាំងមូលដ្ឋានកងរាជអាវុធហត្ថ ស្រុកកំពង់សីលា ​នៅចំណុច ភូមិ​ស្ទឹងច្រាល ឃុំអូរបាក់រទេះ ស្រុកកំពង់សីលា ខេត្តព្រះសីហនុ។

បច្ចុប្បន្នជនសង្ស័យទាំង ០៥នាក់ រួមជាមួយវត្ថុតាង ត្រូវបានកម្លាំងការិយាល័យប្រឆាំងគ្រឿងញៀន នៃទីបញ្ជាការដ្ឋានកងរាជអាវុធហត្ថខេត្តព្រះសីហនុ បញ្ជូនខ្លួនទៅកាន់សាលាដំបូងខេត្តព្រះសីហនុ ដើម្បីផ្តន្ទាទោសរួចហើយ នៅថ្ងៃទី​២៥ ខែវិច្ឆិកា ឆ្នាំ​២០២១នេះ៕ ដោយ៖ ហ្វារីត

អត្ថបទដែលជាប់ទាក់ទង