រូបថតលេីអាកាសខ្លះៗ​នៃឆ្នេរទី៤ កោះកុងក្រៅ​​ ក្នុងខេត្តកោះកុង

ខេត្តកោះកុង៖ ក្រសួងទេសចរណ៍ បានបង្ហោះអត្ថបទ និងរូបថតខ្លះៗ ដែលថតពីលើអាកាស នៃទិដ្ឋភាព ឆ្នេរសមុទ្រ “កោះកុងក្រៅ​” ស្ថិតក្នុងឃុំជ្រោយប្រស់ ស្រុកកោះកុង ខេត្តកោះកុង ជូនភ្ញៀវទេសចរជាតិ និងអន្តរជាតិ ចូលទៅកម្សាន្ត..។

ឆ្នេរកោះកុងក្រៅ​ មាន ០៦ឆ្នេរ​ ហើយឆ្នេរនីមួយៗមានខ្សាច់សស្អាត​ ទឹកសមុទ្រថ្លាអាចមេីលឃេីញដល់បាតសមុទ្រ​ និងមានព្រែកខាងក្រោយឆ្នេរ​ ដែលអាចឲ្យអ្នកទេសចរ អាចគយគន់ទេសភាពយ៉ាងស្រស់ស្អាត។

ក្រសួងទេសចរណ៍ បញ្ជាក់ថា សម្រាប់ឆ្នេរ ដែលភ្ញៀវទេសចរ និយមធ្វើដំណើរទៅលេងកម្សាន្ត​ និងមានទឹកប្រេីប្រាស់គ្រប់គ្រាន់​ គឺឆ្នេរទី៣​ និងទី៤​ គឺនៅទីនោះភ្ញៀវទេសចរ អាចអង្គុយលេងស្ទូចត្រី​ ងូតទឹក​ ជិះទូកលេង​ ទស្សនាទឹកធ្លាក់​ និងគយគយមេីលទិដ្ឋភាពថ្ងៃរៀបលិចជាដើម..។

ចំពោះការធ្វេីដំណេីរ ទៅកាន់ឆ្នេរទាំងនោះ​ គឺភ្ញៀវទេសចរ ត្រូវធ្វេីដំណេីរ​ ដោយយាន្ត​ ឬម៉ូតូទៅកាន់ខេត្តកោះកុង​ (បេីមកពីភ្នំពេញ​ ហួសផ្លូវបត់តារាសាគរប្រមាណ​ ២០គីឡូ​ នៅខាងឆ្វេង​ នឹងឃេីញផ្លូវដីក្រហមមួយ​។ បន្ទាប់មកបត់តាមផ្លូវក្រហម​នោះ រួចជិះប្រកាន់ផ្លូវបត់ឆ្វេង​ ប្រមាណជា ១០គីឡូ​ម៉ែត្រ នឹងទៅដល់ភូមិនេសាទមួយ​ ដែលអាចឡេីងទូកនៅទីនោះ) ហើយបន្ទាប់មក គឺធ្វេីដំណេីរដោយទូក​ប្រមាណ​ ០១ម៉ោងកន្លះ ទៅ ០២ម៉ោង​ ពីផែទូក​ ដេីម្បីបានទៅដល់ឆ្នេរកោះកុងក្រៅ។

ចំពោះ ការស្នាក់នៅ គឺ
ដោយសារទីនោះជាទីតាំងធម្មជាតិ​ មិនទាន់មានការអភិវឌ្ឍន៍​ ភ្ញៀវទេសចរ ​អាចស្នាក់នៅដោយការបោះជំរុំតង់លេីឆ្នេរខ្សាច់ ដោយខ្លួនឯង។

ដោយឡែក ចំពោះការរៀបចំម្ហូបអាហារ ភ្ញៀវទេសចរ អាចត្រៀម​ អង្ករ​ និងម្ហូបផ្សេងៗ​ ដូចជាត្រី​ សាច់​ ឬគឿងសមុទ្រ​ និងគ្រឿងទេសសម្រាប់ធ្វេីម្ហូបទទួលទាន នៅទីនោះ​ (ម្ចាស់ទូកអាចជួយដាំបាយ​ និងធ្វេីម្ហូបបាន)។

យ៉ាងណាក៏ដោយចុះ ក្រសួងទេសចរណ៍ សំណូមពរថា ភ្ញៀវទេសចរទាំងអស់ សូមចូលរួមរក្សាវេចខ្ចប់សំរាម ឬកាកសំណល់ផ្សេងៗ ឲ្យមានសណ្តាប់ធ្នាប់​ ដេីម្បីរក្សាសោភណ្ឌភាពឆ្នេរស្អាតសម្រាប់ជាការទាក់ទាញភ្ញៀវទេសចរ ចូលទៅទស្សនាតំបន់ទេសចរណ៍ធម្មជាតិមួយនេះ ឲ្យបានច្រើនថែមទៀត នាថ្ងៃអនាគត។

ជាងនេះទៀត ក៏ស្នើសូមកុំប្រេីប្រាស់ឧបករណ៍បំពងសម្លេងខ្លាំងៗ​ នាំឲ្យរំខានដល់អារម្មណ៍ភ្ញៀវទេសចរផ្សេងទៀត។

ខាងក្រោមនេះ គឺទីតាំងផែ និងលេខសម្រាប់កក់ទូក៖
https://maps.app.goo.gl/eeTms8r1osA5ad4v6
096 559 2295​ (ប៊ុន ថេត)៕

រូបថត​ និងអត្ថបទដោយ: រស់​ សន្ធិ​ (ROS Santhy)

អត្ថបទដែលជាប់ទាក់ទង