នគរបាលខេត្ត​ព្រះសីហនុ បង្ក្រាបអំពើ​លួច​ និង​ទទួលផល​ចោរកម្ម​ ឃាត់ជន​ពាក់ព័ន្ធ​៨​នាក់​

ខេត្ត​ព្រះ​សីហ​នុ​៖​ សមត្ថកិច្ចនគរបាល បានឲ្យដឹងថា នៅម៉ោង ០៩ និង០០នាទី ​ថ្ងៃ​ទី​១៩​ ខែធ្នូ​ ឆ្នាំ​២០២១​​ ការិយាល័យ​នគរបាល​ព្រហ្មទណ្ឌ​កម្រិត​ស្រាល​បាន​ទទួល​បណ្តឹង​ពី​ប្រជាពលរដ្ឋ​ម្នាក់​ថា​ ខ្លួន​បាន​បាត់​ម៉ូតូ​ ០១​គ្រឿង​ម៉ាក ZOOMER​ X​ ឆ្នាំ​២០១៨​ ពណ៌​ស្វាយ​ ពាក់​ស្លាក​លេខ​ ព្រះ​សីហ​នុ​ 1G-6945​ ដែល​ចត​ទុក​នៅ​មុខ​បន្ទប់​ជួល​ ស្ថិត​នៅ​ ក្រុម​ទី​១៩​ ភូមិ​៥​ សង្កាត់​៤​ ក្រុង​-​ខេត្ត​ព្រះ​សីហ​នុ​។​

បន្ទាប់​ពី​ទទួល​បណ្តឹង​រួច​ កម្លាំង​ជំនាញ​ផែនការ​ងារ​ព្រហ្មទណ្ឌ​ ក៏បានចុះស្រាវជ្រាវរហូត​ឈាន​ដល់​ការ​ឃាត់ខ្លួន​ជនសង្ស័យ​ចំនួន​ ០៨​នាក់​ ភេទ​ប្រុស​ ជនជាតិ​ខ្មែរ​ ជា​បន្តបន្ទាប់​ (​ក្នុង​នោះ​មាន​ជនសង្ស័យ​ចំនួន​ ០៦​នាក់​ ពាក់ព័ន្ធ​នឹង​ករណី​ លួច​កាច់​បំបែក​សោ​រក​ម៉ូតូ​ និ០២​នាក់​ទៀត​ ពាក់ព័ន្ធ​នឹង​ ករណី​ ទទួលផល​ចោរកម្ម​)​។​

សមត្ថកិច្ច បញ្ជាក់ថា ជន​រង​គ្រោះ​ខាងលើឈ្មោះ​ សៀង​ ចាន់​ដា​ ភេទ​ប្រុស​ អាយុ​ ២៧​ឆ្នាំ​ ជនជាតិ​ខ្មែរ​ មុខរបរ​ ចុងភៅ​ មាន​ទីលំនៅ​ ភូមិ​៥​ សង្កាត់​៤​ ក្រុង​-​ខេត្ត​ព្រះ​សីហ​នុ​។​ រីឯ​សម្ភារៈបាត់បង់​ គឺម៉ូតូ​ ០១​គ្រឿង​ ម៉ាក​ ZOOMER​ X​ ស៊េរី​ឆ្នាំ​២០១៨​ ពណ៌​ស្វាយ​ លេខ​ទួ​ 5009840​ លេខ​ម៉ាស៊ីន​ 5009840​ ពាក់​ស្លាក​លេខ​ ព្រះ​សីហ​នុ​ 1G-6945​។​

ចំពោះសម្ភារៈ​វត្ថុ​តាង​ចាប់​យក​បាន​រួមមាន៖​

-​ ម៉ូតូ​ចំនួន​ ០៦​គ្រឿង​ ម៉ាក​ ZOOMER​ X​ ចំនួន ០៤​គ្រឿង​,​ ម៉ាក​ HONDA​ ICON​ ០១​គ្រឿង​ និង​ SUZUKI​ MIO​ ចំនួន ០១​គ្រឿង​ -​ស្លាក​លេខ​ម៉ូតូ​ ចំនួន​ ១២​ សន្លឹក​ -​កញ្ចក់​ម៉ូតូ​ ១​គូ​ និងកាង​ម៉ូតូ​ ០១​។​

ចំពោះ ករណី​ខាងលើ​នេះ ស្នងការដ្ឋាន​នគរបាល​ខេត្ត​ព្រះសីហនុ សូម​ជូន​ព័ត៌មាន​ដល់​ជន​រង​គ្រោះ​ដែល​បាត់​ម៉ូតូ​ រួសរាន់​មក​ពិនិត្យ​ម៉ូតូ ​ដែល​សមត្ថកិច្ច​ដកហូត​បាន​នៅ​ការិយាល័យ​ព្រហ្មទណ្ឌ​កំរិត​ស្រាល​។​

ចំណែក​ជនសង្ស័យ​ កម្លាំង​ជំនាញ​កសាង​សំណុំរឿង​បញ្ជូន​អនុវត្ត​បន្ត​តាម​នីតិវិធី​៕

អត្ថបទដែលជាប់ទាក់ទង