មន្ត្រី​ពន្ធដារខេត្តព្រះសីហនុ ចាប់ផ្តើម​ចុះត្រួតពិនិត្យពន្ធ​យានយន្ត ដែលមិនបានបង់ពន្ធឆ្នាំ​២០២១

ខេត្តព្រះសីហនុ៖ មន្ត្រីសាខាពន្ធដារខេត្តព្រះសីហនុ សហការពីសមត្ថកិច្ចចំរុះ នៃរដ្ឋបាលខេត្តព្រះសីហនុ បានចាប់ផ្តើមចុះត្រួតពិនិត្យពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ (លើកលែងម៉ូតូ) សម្រាប់ឆ្នាំ២០២១ ទៅលើម្ចាស់យានយន្តទាំងឡាយណា ដែលខកខានមិនបានបង់ពន្ធប្រចាំឆ្នាំ ត្រឹមត្រូវតាមច្បាប់។
មន្ត្រីសាខាពន្ធដារខេត្តព្រះសីហនុ បញ្ជាក់ថា សកម្មភាពចុះត្រួតពិនិត្យលើមធ្យោបាយយានយន្តខាងលើនេះ គឺបានចាប់ផ្តើមកាលពីពីថ្ងៃទី០៧ ខែកុម្ភ: ឆ្នាំ២០២២ នៅតាមដងផ្លូវនានា ក្នុងក្រុងព្រះសីហនុ និងបន្តចុះត្រួតពិនិត្យជាបន្តបន្ទាប់ទៀត នៅតាមបណ្តាក្រុង- ស្រុក ទូទាំងខេត្តព្រះសីហនុ។
​មន្ត្រីពន្ធដារដដែលបានឲ្យដឹងបន្តទៀតថា ចំពោះម្ចាស់យានយន្ត ដែល​មិនបានបង់ពន្ធប្រចាំឆ្នាំ២០២១កន្លងទៅ គឺតម្រូវឲ្យបង់ប្រាក់ពន្ធផង និងបូកបន្ថែម​ប្រាក់ពិន័យផង ហើយប្រាក់ពិន័យ គឺមានចំនួនស្មើនឹងប្រាក់ពន្ធ​ដែរ។​
អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី២៨ ខែមករា ឆ្នាំ២០២២ ​បានចេញសេចក្តីជូនដំណឹង ស្តីពីការ​ចុះត្រួតពិនិត្យការប្រកាសបង់ពន្ធ លើមធ្យោបាយដឹកជញ្ជូន និងយានជំនិះគ្រប់ប្រភេទ ប្រចាំឆ្នាំ២០២១។

សេចក្តីជូនដំណឹងនោះ អគ្គនាយកដ្ឋានពន្ធដារ បានជម្រាបជូនទៅម្ចាស់យានយន្តទាំងអស់​ថា អនុលោមតាមប្រកាស លេខ ៥៣១ សហវ.ប្រក ចុះថ្ងៃទី៣០ ខែឧសភា ឆ្នាំ២០១៨ របស់ក្រសួងសេដ្ឋកិច្ចនិងហិរញ្ញវត្ថុ និងចំណារឯកភាព របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណា​ចក្រ​កម្ពុជា ចុះថ្ងៃទី៣០ ខែធ្នូ ឆ្នាំ២០២០ ក្រុមការងារចម្រុះ រាជធានី-ខេត្ត ដឹកនាំដោយមន្ត្រីពន្ធដារ រួមសហការ​ជាមួយ អាជ្ញាធរមានសមត្ថកិច្ចថ្នាក់ក្រោមជាតិ នឹងចុះត្រួត ពិនិត្យការប្រកាស បង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ ប្រចាំឆ្នាំ២០២១ នៅតាមគោលដៅមួយចំនួន លើកំណាត់ផ្លូវសំខាន់ៗ នៃរាជ​ធានី-ខេត្ត ចាប់ពីថ្ងៃទី០១ ខែកុម្ភៈ ឆ្នាំ២០២២​តទៅ ។

​សេចក្តីជូនដំណឹង​ដដែលនេះ អគ្គនាយកដ្ឋានពន្ធដារ មានជំនឿ​ថា ម្ចាស់យានយន្តទាំងអស់ នឹងយកចិត្តទុកដាក់គោរពកាតព្វកិច្ចសា​រ​ពើពន្ធ និងរួសរាន់អញ្ជើញទៅប្រកាស​បង់ពន្ធ ឲ្យបានបានគ្រប់ៗគ្នា និងឲ្យ​បានទាន់ពេលវេលា ស្របតាមបទប្បញ្ញត្តិ នៃច្បាប់ ដើម្បីចៀសវាង នូវក្រុមការងារចម្រុះ រួម​សហ​ការជាមួយ​ អាជ្ញាធរមានសមត្ថ​កិច្ចថ្នាក់ក្រោមជាតិ ចុះឃាត់យានយន្តតាមដងផ្លូវ តម្រូវឱ្យបង់ប្រាក់ពន្ធ ដែលនាំឲ្យ​ខាតវេលា និងកកស្ទះចរាចរណ៍ ក្នុងពេល​ធ្វើដំណើរ ដែលអាចនឹងកើតមានឡើង ដោយ​ប្រការណាមួយជាយថាហេតុ..៕ ដោយ៖ មិន ឌីណា

អត្ថបទដែលជាប់ទាក់ទង