​ឧកញ៉ា ទៀ វិចិត្រ បន្តនាំយក​អណ្តើកសមុទ្រធំមួយក្បាលទៀត លែងឲ្យរស់នៅក្នុងសមុទ្រធម្មជាតិវិញ​

ខេត្តព្រះសីហនុ ៖ នេះជាលើកទី១៣១ហើយ ដែល លោកឧកញ៉ា ទៀ វិចិត្រ សមាជិកក្រុមការងារយុវជន គណបក្សប្រជាជនកម្ពុជា ខេត្តព្រះសីហនុ បាននាំយកសត្វល្មិច ឬអណ្តើកសមុទ្រ យកទៅលែងឲ្យរស់នៅក្នុងសមុទ្រធម្មជាតិវិញ ស្របតាមផែនការអភិរក្សសត្វសមុទ្រកម្រ របស់លោក នៅក្នុងប្រទេសកម្ពុជា។

សកម្មភាពនាំយកអណ្តើកសមុទ្រ ​លែងចូលសមុទ្រ​ របស់លោកឧកញ៉ា ទៀ វិចិត្រ ខាងលើនេះ បានធ្វើឡើង​កាលពីព្រឹកថ្ងៃទី១៨ ខែកុម្ភៈ ឆ្នាំ២០២២។

លោកឧកញ៉ា ទៀ វិចិត្រ មានប្រសាសន៍ថា មុនលែងសត្វអណ្តើកសមុទ្រធំមួយក្បាលនេះ ចូលទៅក្នុងសមុទ្រ គឺរូបលោក បានកឹបសៀល នៅលើសត្វអណ្តើកនោះ ស្រប​​តាមបច្ចេកទេស​ សម្រាប់សម្គាល់សត្វល្មិច ឬអណ្តើកសមុទ្រ ដែល​បានលែងចូលទៅក្នុងសមុទ្រទាំងនោះ។ ហើយសៀល​ដែលកឹប នៅលើសត្វអណ្តើកសមុទ្រជាបន្តបន្ទាប់មកនេះ គឺជាសញ្ញាសម្រាប់សម្គាល់ ក្នុងគោលការណ៍អភិរក្សសត្វសមុទ្រកម្រ ជាលក្ខណៈអន្តរជាតិ។ លោកឧកញ៉ា បន្តថា សៀលដែល​កឹបលើសត្វល្មិច ឬអណ្តើកសមុទ្រធំមួយក្បាល ខាងលើនេះ មានលេខ៖ KH0393។

លោកឧកញ៉ា ទៀ វិចិត្រ ឲ្យដឹងដូច្នេះ រួចបញ្ជាក់ថា រាល់សត្វល្មិច ឬអណ្តើកសមុទ្រ និងសត្វក្រាស់ ដែលលោកឧកញ៉ា បានទទួលពីអ្នកនេសាទកន្លងមកនេះ គឺភាគច្រើន មិនទាន់មានកឹបសៀលសម្គាល់នោះទេ ទើប លោកឧកញ៉ា បានរៀបចំ​កឹបសៀល ឲ្យស្របតាមបច្ចេកទេសត្រឹមត្រូវជាមុនសិន ទើបនាំយក​​សត្វសមុទ្រកម្រទាំងនោះ យកទៅលែងឲ្យរស់នៅក្នុងសមុទ្រធម្មជាតិវិញ។

លោកឧញ៉ាបន្តថា ​ការកឹបសៀលសម្គាល់នៅលើសត្វអណ្តើកសមុទ្រ ឬសត្វល្មិច គឺមានសារៈសំខាន់បំផុត ព្រោះថា ប្រសិនបើអ្នកនេសាទ ឬចាប់បាន សត្វល្មិច ឬអណ្តើកសមុទ្រ ដែល​មានកឹបសៀលសម្គាល់ គឺអ្នកនេសាទ​នៅតាមប្រទេសនានា រាប់ទាំងកម្ពុជាផង នឹង​នឹង​លែងសត្វសមុទ្រកម្រទាំងនោះ ចូលទៅក្នុងទឹកសមុទ្រវិញ ដោយពួកគេ មិនសម្លាប់ ឬមិននាំយកទៅធ្វើជំនួញជួញដូរផ្សេងៗនោះទេ។

​ឆ្លៀតក្នុងឱកាសនេះ​ លោកឧកញ៉ា ទៀ វិចិត្រ ដែលជាប្រធានក្រុមហ៊ុន ជី.ធី.វី.ស៊ី (G.T.V.C) ផងនោះ  បានថ្លែងអំណរគុណដល់ បងប្អូនប្រជានេសាទទាំងអស់ ដែលបានចូលរួមសហការ ​ការពារ និងអភិរក្សសត្វសមុទ្រកម្រ ជាមួយរូបលោក ក៏ដូចជាមួយរាជរដ្ឋាភិបាល ជាបន្តបន្ទាប់មកនេះ៕

អត្ថបទដែលជាប់ទាក់ទង