ផ្លូវលេខ១៤៦បេ តភ្ជាប់ពីផ្លូវជាតិលេខ៤ ត្រង់រង្វង់មូលសម្ដេចសង្ឃ ទេព វង្ស ឆ្ពោះទៅកំពង់ផែក្រុងព្រះសីហនុ នឹងស្ថាបនារួចរាល់ជាស្ថាពរ នៅខែមេសា

ខេត្តព្រះសីហនុ ៖ មន្ត្រីក្រសួងសាធារណៈការ និងដឹកជញ្ជូន បានឲ្យដឹងថា ផ្លូវលេខ ១៤៦បេ ដែលតភ្ជាប់ពីផ្លូវជាតិលេខ៤ ត្រង់រង្វង់មូលសម្ដេចសង្ឃ ទេព វង្ស ក្នុងស្រុកព្រៃនប់ ឆ្ពោះទៅកាន់ស្រុកស្ទឹងហាវ និងទៅភ្ជាប់ដល់កំពង់ផែក្រុងព្រះសីហនុ នឹងស្ថាបនារួចរាល់ជាស្ថាពរ នៅខែមេសាខាងមុខ ។

កាលពីថ្ងៃទី២៨ ខែមីនា ថ្នាក់ដឹកនាំក្រសួងសាធារណៈការ និងមន្ត្រីជំនាញ បានចុះត្រួតពិនិត្យគុណភាពផ្លូវមួយខ្សែនេះ ដោយយកចិត្តទុកដាក់ ។

លោក ស៊ុន ចាន់ថុល រដ្ឋមន្ត្រីក្រសួងសាធារណៈការ បានឲ្យដឹងថា ការស្ថាបនាផ្លូវ១៤៦បេ គឺមានគុណល្អត្រឹមត្រូវតាមបច្ចេកទេស ដែលនឹងប្រើប្រាស់យូរអង្វែង ពិសេសគឺការធ្វើចរាចរណ៍រថយន្តដឹកទំនិញធំៗចេញចូលកំពង់ផែ ដើម្បីកាត់បន្ថយគ្រោះថ្នាក់ ឬកកស្ទះចរាចរណ៍ក្នុងក្រុងព្រះសីហនុ ។

ផ្លូវ​លេខ​១៤៦​បេ សាងសង់ឡើងក្រោម​កញ្ចប់​ថវិកាសន្សំ របស់​ជាតិ ផ្លូវ​នេះ​ មាន​ប្រវែងសរុប ៤៣,០២ គីឡូម៉ែត្រ ក្នុងនោះ​ប្រវែង ២១ គីឡូម៉ែត្រ ជា​ប្រភេទផ្លូវ​បេតុង​កៅស៊ូ (AC) កម្រាស់ ៩ សង់ទីម៉ែត្រ​, ចំណែក​ប្រវែង ២២​គីឡូម៉ែត្រទៀត ជា​ប្រភេទ​ផ្លូវបេតុង កម្រាស់ ២៦ សង់ទីម៉ែត្រ និង​ទទឹងផ្លូវសរុបជារួម ១២ ម៉ែត្រ​៕

អត្ថបទដែលជាប់ទាក់ទង