កញ្ញា សេង ធារី ត្រូវ​សមត្ថកិច្ច​ចាប់​បញ្ជូន​ខ្លួន​ ទៅ​ពន្ធនាគារ​ភ្លាមៗ ក្រោយ​តុលាការ​ផ្ដន្ទាទោស​ដាក់​ពន្ធនាគារ ​ពី​បទ​រួមគំនិតក្បត់

រាជធានីភ្នំពេញ ៖ សមត្ថកិច្ចរាជធានីភ្នំពេញ ប្រមាណ ៥០នាក់​​ បានចាប់ខ្លួន កញ្ញា សេង ធារី បញ្ជូនទៅពន្ធនាគារ​​ភ្លាមៗ​ នៅព្រឹកថ្ងៃអង្គារ​ ទី១៤ ខែមិថុនា ឆ្នាំ២០២២នេះ ក្រោយពី​តុលាការ​សាលាដំបូងរាជធានីភ្នំពេញ​ បាន​ប្រកាសសាលក្រមដោយផ្ដន្ទាទោសដាក់ពន្ធនាគារ​​​​កញ្ញា រួម​នឹង​សកម្មជន​​គណបក្សសង្គ្រោះជាតិ ដែលត្រូវបានតុលាការរំលាយជាច្រើនរូបទៀត ក្នុងម្នាក់ៗ​ចន្លោះពី ៥ឆ្នាំទៅ ៨ឆ្នាំ ក្រោមបទចោទ «រួមគំនិតក្បត់»។

តំណាង​អយ្យការ​អម​សាលា​ដំបូង​រាជធានី​ភ្នំពេញ បាន​ចេញ​ដីកាកាល​ពី​ឆ្នាំ២០២០ ចោទ​ប្រកាន់​កញ្ញា សេង ធារី ជាមេធាវីម្នាក់ដែលបានបញ្ចប់ការសិក្សាថ្នាក់បណ្ឌិតច្បាប់នៅសហរដ្ឋអាមេរិក ​និង​សកម្មជន​បក្ស​ប្រឆាំង​ សរុប ១២០នាក់ ពី​បទ ​«រួម​គំនិត​ក្បត់ និង​ញុះញង់» ដោយ​សារ​​ការ​​បង្ហោះ​សារ​គាំទ្រ​ផែនការ​មាតុ​ភូមិ​និវត្តន៍​ របស់លោក សម រង្ស៊ី ​អតីត​ប្រធាន​​គណបក្សសង្គ្រោះជាតិដែលតុលាការ​ បានរំលាយ កាលពី​ឆ្នាំ២០១៩។

ដោយសារ​​សំណុំ​រឿង​នេះ​ មាន​ជន​សង្ស័យ​ច្រើន​ពេក តុលាការ​បាន​បំបែក​​សំណុំ​រឿង​នេះជាពីរធំៗ ហើយ កញ្ញា សេង ធារី ស្ថិតនៅក្នុងចំណោមជនសង្ស័យចំនួន ៤២នាក់។

ជុំវិញសំណុំរឿង​ ដែលមានជនសង្ស័យជាង ៤០នាក់នេះ ចៅក្រមសាលាដំបូងរាជធានីភ្នំពេញ លោក រស់ ពិសិដ្ឋ បាន​ប្រកាសសាលក្រម​នៅថ្ងៃអង្គារ នេះ ដោយ​សម្រេច​ផ្ដន្ទាទោស​កញ្ញា សេង ធារី ឱ្យ​ជាប់ពន្ធនាគារចំនួន ៦ឆ្នាំ ពីបទ «រួមគំនិតក្បត់»។

ចំណែកសកម្មជន​បក្សសង្គ្រោះជាតិ ដែលត្រូវបានតុលាការ​បានរំលាយផ្សេងទៀត ក្នុងនោះមាន​អ្នកស្រី យក់ នាង, ​លោក កាក់ កុម្ភារ, លោក ហេង ច័ន្ទ​សុទ្ធី និង​លោក ទុំ ប៊ុនថន ត្រូវបានតុលាកា​រសម្រេច​​ផ្តន្ទាទោស​ដាក់ពន្ធនាគារ​​ចន្លោះពី ៥ទៅ ៨ឆ្នាំ ខណៈសកម្មជន​​ខ្លះ​​ត្រូវ​បានតុលាការ​​ព្យួរ​ទោស។

​អ្នកស្រី ព្រំ ចាន់ថា ដែលជាភរិយា លោក កាក់ កុម្ភារ សកម្មជនគណបក្សសង្គ្រោះដែល​តុលាការ​បានរំលាយ ​មានប្រសាសន៍ថា ស្វាមីអ្នកស្រី ត្រូវបាន​តុលាការ​ផ្តន្ទាទោស​ដាក់ពន្ធគារ​ចំនួន ៦ឆ្នាំ ពីបទ «រួមគំនិតក្បត់ និងញុះញង់»។ អ្នកស្រី​បានចាត់ទុកការប្រកាសសាលក្រមរបស់​តុលាការនេះ​ថា ជារឿងអយុត្តិធម៌ ខណៈស្វាមីអ្នកស្រីពុំបានប្រព្រឹត្តដូចការចោទប្រកាន់។

ក្រោយការប្រកាសសាលក្រមនៅព្រឹកមិញនេះដែរ ក៏មានការប៉ះទង្គិចគ្នា រវាង​ក្រុមគ្រួសារសកម្មជន​គណបក្សសង្គ្រោះជាតិដែលត្រូវបានតុលាការ​រំរលាយ​ អ្នកគាំទ្រ​ កញ្ញា សេង ធារី ជាមួយ​នឹង​ក្រុម​ប្រជាការពារ ខណៈពួកគេ​ព្យាយាម​ស្រែកទាមទារ​រកយុត្តិធម៌ នៅមុខសាលាដំបូងរាជធានីភ្នំពេញ។

សវនាការលើកញ្ញា សេង ធារី និងសំណុំរឿង​ក្បត់​ជជាតិ របស់​អតីត​អ្នក​គាំទ្រ​ សកម្មជន​ និង​ថ្នាក់ដឹកនាំ​គណបក្ស​សង្គ្រោះ​ជាតិ​ដែលត្រូវ​បានរំលាយ​កាលពី​ឆ្នាំ​២០១៧​ បាន​ចាប់​ផ្តើម​កាលពីដើម​ខែធ្នូ ឆ្នាំ២០២១​ បន្ទាប់​ពី​អាក់​ខានអស់រយៈពេល​ជាង​មួយ​ឆ្នាំ​៕ ប្រភព ៖ VOD

អត្ថបទដែលជាប់ទាក់ទង