ថ្នាក់ដឹកនាំ​រដ្ឋបាលខេត្តព្រះសីហនុ ​ចូលរួម​ពិធីប្រារព្ធខួបលើកទី១៥ ទិវាអតីតយុទ្ធជនកម្ពុជា​

ខេត្តព្រះសីហនុ ៖ អភិបាលខេត្តព្រះសីហនុ និងជាប្រធានកិត្តិយសសមាគមអតីតយុទ្ធជន ខេត្តព្រះសីហនុ លោក គួច ចំរើន ​បានអញ្ជើញចូលរួមជាអធិបតីភាព ក្នុងពិធីប្រារព្ធខួបលើកទី១៥ ទិវាអតីតយុទ្ធជនកម្ពុជា ខេត្តព្រះសីហនុ។

ពិធីនេះរៀបចំឡើង កាលពីព្រឹកថ្ងៃទី២៨ ខែមិថុនា ឆ្នាំ​២០២២ ដោយមានការចូលរួមពី លោក ម៉ាង ស៉ីណេត អភិបាលរងខេត្ត លោកឧត្តមសេនីយ៍ត្រី នូវ សំអុល មេបញ្ជាការ នៃតំបន់ប្រតិបតិ្តការសឹករងព្រះសីហនុ និង លោក លោកស្រី ប្រធានមន្ទីរអង្គភាព នាយទាហាន នាយទាហានរង ពលទាហាន ព្រមទាំងអតីតយុទ្ធជនជាច្រើនរូបទៀត។

នៅក្នុងពិធីនោះ លោកឧត្តមសេនីយ៍ត្រី នូវ សំអុល ​បានឱ្យដឹងថា កម្ពុជា ធ្លាប់បានឆ្លងកាត់សង្គ្រាម និងរបបប្រល័យពូជសាសន៍ បានបន្សល់​ទុក នូវផលវិបាក ហើយ​ក៏បានរំដោះប្រទេសជាតិ កសាងអភិវឌ្ឍន៍ប្រទេសជាតិ ឲ្យរីកចម្រើនលើគ្រប់វិស័យ ជាបន្តបន្ទាប់ដូចសព្វថ្ងៃ។ លោកបន្តថា សមិទ្ធិផលទាំងអស់នេះ បានមក​ពីការចូលរួមចំណែក​យ៉ាងធំធេង របស់ជ័យជំនះ ជាប្រវត្តិសាស្ត្រ ថ្ងៃទី៧ មករា ១៩៧៩ ក្រោមការដឹកនាំ របស់គណបក្សប្រជាជនកម្ពុជា ហើយបងប្អូនអតីតយុទ្ធ​ជន​ទាំងអស់ ​រួមជាមួយ កុលបុត្រខ្មែរជំនាន់ក្រោយ ត្រូវតែចងចាំ នូវគុណបំណាច់របស់ពួកគាត់។ ហើយ គុណបំណាច់ដ៏ថ្លៃថ្លានេះ ត្រូវបានរាជរដ្ឋាភិបាល យកចិត្តទុកដាក់យ៉ាងខ្លាំង ដល់អតីតយុទ្ធជនតាមរយៈការធានាផ្ដល់នូវកម្រិតជីវភាពរស់នៅ របស់បងប្អូន ប្រកបដោយសុខដុមរមនាជាមួយក្រុមគ្រួសារ និងសហគមន៍។

ចំណែក លោក គួច ចំរើន ​មានប្រសាសន៍ថា តាងនាមរដ្ឋបាលខេត្តព្រះសីហនុ និងក្នុងនាមខ្លួនខ្ញុំផ្ទាល់ ខ្ញុំពិតជាមានសេចក្តីសោមនស្សរីករាយ ដែលបានមកចូលរួមក្នុង ពិធីប្រារព្ធខួបលើកទី១៥ ទិវាអតីតយុទ្ធជនកម្ពុជា ដើម្បីរំឭកដល់គំរូវីរភាពដ៏មោះមុត នឹងគុណបំណាច់ដ៏ធំធេងរបស់វីរយុទ្ធជន យុទ្ធនារី នៃកងកម្លាំងប្រដាប់
អាវុធ និងប្រជាពលរដ្ឋ គ្រប់ស្រទាប់ ដែលបានពលិកម្មយ៉ាងអង់អាចក្លាហាន បូជាសាច់ស្រស់ ឈាមស្រស់ ដើម្បីបុព្វហេតុជាតិមាតុភូមិ ជាទីស្នេហា នៃយើង ពលិកម្មប្រកបដោយស្មារតីស្នេហាជាតិ របស់វីរអតីតយុទ្ធជន យុទ្ធនារី និងប្រជាពលរដ្ឋយើង។

លោកអភិបាលខេត្ត ក៏បាននាំយកជំនួយ​ របស់សម្ដេចតេជោប្រគល់ជូនសមាជិក សមាគមអតីតយុទ្ធជន ខេត្តព្រះសីហនុ ចំនួន ១៧០នាក់​ ដោយក្នុងម្នាក់ៗ ទទួលបានអង្ករ ២៥គីឡូក្រាម, ត្រីខ ១យួរ, ទឹកត្រី ១យួរ, មី១កេស, និងថវិកា ៥ម៉ឺនរៀល៕ ដោយ៖ ហ្វារីត

អត្ថបទដែលជាប់ទាក់ទង