ខ្មាន់កាំភ្លើងដែលបាញ់ រថយន្ដអ្នកដំណើរនៅផ្លូវជាតិលេខ៦អា និងផ្លូវជាតិលេខ៤ ត្រូវកម្លាំងនគរបាលចាប់ខ្លួនបាន ខេត្តកណ្ដាល

ខេត្តកណ្ដាល ៖ សមត្ថកិច្ច បានឲ្យដឹងថា ខ្មាន់កាំភ្លើងម្នាក់ ដែលបាញ់ប្រហារលើរថយន្ដអ្នកដំណើរនៅផ្លូវជាតិលេខ៦អា និងផ្លូវជាតិលេខ៤ ត្រូវកម្លាំងនគរបាលនៃអធិការដ្ឋាននគរបាល ស្រុកអង្គស្នួលស្រាវជ្រាវតាមចាប់ខ្លួនបាន នៅរសៀលថ្ងៃទី២៧ ខែកញ្ញា ឆ្នាំ២០២២នេះ ភូមិជ្រៃមង្គល ឃុំដំណាក់អំពិល ស្រុកអង្គស្នួល ខេត្តកណ្ដាល។

របាយការណ៍ របស់សមត្ថកិច្ច បានឲ្យដឹងថា ក្នុងហេតុការណ៍នេះមមិនបណ្ដាលឲ្យពលរដ្ឋណាម្នាក់រងគ្រោះថ្នាក់ទេ ដោយគ្រាន់តែខូចខាតរថយន្ដ របស់អ្នកដំណើរពីរគ្រឿង។ ក្នុងនោះម្ចាស់រថយន្ដទី១- ឈ្មោះ សួង បូនិច អាយុ ៣៤ឆ្នាំ (ម្ចាស់រថយន្តកាមរីបាឡែន) ពាក់ផ្លាកលេខភ្នំពេញ 2BC-4568 ត្រូវចំទ្វាមុខ ខាងស្ដាំមួយគ្រាប់ និងទី២- ឈ្មោះ ណាត បូផាន់ អាយុ ២៧ឆ្នាំ (ម្ចាស់រថយន្តហាយឡែនឌ័រ) ពាក់ផ្លាកលេខភ្នំពេញ 2AD-4931 ត្រូវចំស្តុបឆ្វេង ខាងក្រោយមួយ១គ្រាប់ និងចំថ្ពល់មុខខាងឆ្វេងមួយគ្រាប់។

សមត្ថកិច្ច បញ្ជាក់ថា ខ្មាន់កាំភ្លើងដែលត្រូវបានឃាត់ខ្លួនមាន ឈ្មោះ ញឹក សុវុត្ថា ហៅស្រួច ហៅថាច (មានសារធាតុញៀន) អាយុ ៣៧ឆ្នាំ មុខរបរអ្នកយកសារព័ត៌មាន សង្គមអភិវឌ្ឍន៍ នៅភូមិបុរីកម្មករ សង្កាត់ទឹកថ្លា ខណ្ឌសែនសុខ រាជធានីភ្នំពេញ ក្នុងនោះដកហូតបាន វត្ថុតាងចាប់យកអាវុធខ្លីម៉ាក G-Lock19 (USA) RTP75555 ០១ដើម បង់០១ គ្រាប់០១ សំបកកាទូសចំនួន០២ និងម៉ូតូមួយគ្រឿងម៉ាក ADV ពណ៌ស ឆ្នាំ២០២១ ពាក់ផ្លាកលេខ ភ្នំពេញ 1JE-3621 ព្រមទាំងសម្ភារមួយចំនួនទៀត។

សមត្ថកិច្ច បានបន្ដទៀតថា មុនពេលកើតហេតុ ជនសង្ស័យខាងលើបានជិះម៉ូតូម៉ាក ADV ពណ៌ស ឆ្នាំ២០២១ ពាក់ផ្លាកលេខ ភ្នំពេញ 1JE-3621 កាន់អាវុធខ្លីមួយដើម បាញ់រថយន្ដអ្នកដំណើរតាមដងផ្លូវជាតិលេខ៤។ ក្រោយពីទទួលបានព័ត៌មាន កម្លាំងអន្តរាគមន៍អធិការដ្ឋាននគរបាល ស្រុកអង្គស្នួល សហការជាមួយកម្លាំងប៉ុស្ដិ៍ បានតាមស្ទាក់ ទើបឃាត់ខ្លួនជនសង្ស័យបាននៅចំណុចផ្លូវជាតិលេខ៤ ភូមិជ្រៃមង្គល ឃុំដំណាក់អំពិល ស្រុកអង្គស្នួល ខេត្តកណ្ដាល ហើយបាននាំទៅអធិការដ្ឋាននគរបាលស្រុកដើម្បីសួនាំបន្តតាមនីតិវិធី។

នៅចំពោះមុខសមត្ថកិច្ចជនសង្ស័យ បានសារភាពថា ខ្លួនបានបាញ់ ចំនួន ៤គ្រាប់ ត្រូវរថយន្ត៣គ្រាប់ មុនពេលមកដល់ស្រុកអង្គស្នួល គឺបានបាញ់នៅភ្នំពេញ ជាច្រើនគ្រាប់ ដោយសារខឹងប្រពន្ធ។ បច្ចុប្បន្នកម្លាំងសមត្ថកិច្ចជំនាញ កំពុងបន្តនីតិវិធី៕