ឧកញ៉ា ទៀ វិចិត្រ ជួយសង្គ្រោះស្រ្តីមានជំងឺធ្ងន់ធ្ងរម្នាក់ រស់នៅលើកោះរ៉ុង មកព្យាបាលនៅមន្ទីរពេទ្យ

ខេត្តព្រះសីហនុ ៖ លោកឧកញ៉ា ទៀ វិចិត្រ ប្រធានគណៈកម្មាធិការគណបក្សមូលដ្ឋាន ភ្នាក់ងារដឹកជញ្ជូនទេសចរណ៍ជលយាន ខេត្តព្រះសីហនុ ជាថ្មីទៀត បានបញ្ជូនអូប័រពេទ្យល្បឿនលឿន និងក្រុមការងារសង្គ្រោះ ទៅទទួលយកស្រ្តីម្នាក់ ដែលមានអាការៈចុកពោះខ្លាំង និងទល់លាមក ៣ថ្ងៃកន្លងមកហើយ រស់នៅក្រុងកោះរ៉ុង ដឹកយកមកកាន់ដីគោក នាខេត្តព្រះសីហនុ ដើម្បីសង្គ្រោះបន្ទាន់នៅមន្ទីរពេទ្យ។

សកម្មភាពមនុស្សធម៌នេះ ធ្វើឡើងនៅនៅវេលាម៉ោង ១២ និង៥០នាទី ទាបភ្លឺ ថ្ងៃទី០១ ខែកុម្ភៈ ឆ្នាំ២០២៣។

លោកឧកញ៉ា ទៀ វិចិត្រ មានប្រសាសន៍ថា អ្នកជំងឺរូបនេះ មានឈ្មោះ សំ ស៊ុំ ភេទស្រី អាយុ ៧៤ឆ្នាំ រស់នៅក្នុងភូមិកោះតូច សង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ។

បច្ចុប្បន្ន ស្រ្តីខាងលើ ត្រូវបានក្រុមការងារសង្គ្រោះ របស់ លោកឧកញ៉ា ទៀ វិចិត្រ បញ្ជូនតាមអូប័រពេទ្យល្បឿនលឿន មកកាន់កំពង់ផែ នៅក្រុងព្រះសីហនុ ដោយសុវត្ថិភាព ហើយបានបន្តដឹកតាមរថយន្តសង្គ្រោះ របស់ គណៈកម្មាធិការគណបក្សមូលដ្ឋាន ភ្នាក់ងារដឹកជញ្ជូនទេសចរណ៍ជលយាន ខេត្តព្រះសីហនុ យកទៅសង្គ្រោះបន្ទាន់នៅមន្ទីរពេទ្យ ក្នុងខេត្តព្រះសីហនុ រួចហើយ។

ជាមួយគ្នានោះ តំណាងគ្រួសាររបស់អ្នកជំងឺ បានថ្លែងអំណរគុណ ចំពោះទឹកចិត្តសប្បុរសធម៌ របស់ លោកឧកញ៉ា ដែលបានជួយសង្គ្រោះ ដល់ក្រុមគ្រួសាររបស់គាត់៕ ដោយ៖ ហ្វារីត