ឧត្ដមសេនីយ៍ឯក ទូច ពលៈ ដឹកនាំកម្លាំងចម្រុះ ចុះពិនិត្យទីតាំងដី សម្រាប់ស្ថាបនាប៉ុស្តិ៍នគរបាលរដ្ឋបាល ការពារព្រំដែនទឹក នៅឃុំថ្មស ស្រុកបូទុមសាគរ
ខេត្តកោះកុង ៖ ប្រធាននាយកដ្ឋាននគរបាល ការពារព្រំដែនទឹក និង ជាអគ្គលេខាធិការរង នៃគណៈកម្មាធិការជាតិ សន្តិសុខលម្ហសមុទ្រ គឺលោកឧត្ដមសេនីយ៍ឯក ទូច ពលៈ កាលពីថ្ងៃអាទិត្យ ទី០៤ ខែកុម្ភៈ ឆ្នាំ២០២៤ បានដឹកនាំកម្លាំងចម្រុះ នៃកងកម្លាំងនគរបាល ការពារព្រំដែនទឹក ប្រមាណជាង ៣០នាក់ ចុះពិនិត្យដល់ទីតាំងដី សម្រាប់ស្ថាបនាប៉ុស្តិ៍នគរបាលរដ្ឋបាល ការពារព្រំដែនទឹក ស្តិតក្នុងភូមិសាស្ត្រឃុំថ្មស ស្រុកបូទុមសាគរ ខេត្តកោះកុង។
សកម្មភាពដឹកនាំពិនិត្យដីសង់ប៉ុស្តិ៍រដ្ឋបាលខាងលើនេះ ក៏មានការចូលរួមពី លោក ឧត្ដមសេនីយ៍ ត្រី ផាន់ កណ្ណារ៉ាត់ អនុប្រធាននាយកដ្ឋានទទួលបន្ទុកព្រំដែនទឹក ក្នុងខេត្តកោះកុង លោក វរសេនីយ៍ឯក សុិន ដារ៉ូ មេបញ្ជាការវរៈសេនាតូច នគរបាលការពារព្រំដែន ទឹក លេខ២៦៩ ឈរជើង នៅខេត្តកោះកុង និង លោក ខេង សំខាន់ អភិបាលរងស្រុកបូទុមសាគរ និងអាជ្ញាធរមូលដ្ឋាន ជាច្រើនរូបទៀត។
លោកឧត្តមសេនីយ៍ ឯក ទូច ពលៈ បានបញ្ជាក់ថា ទីតាំងដែលត្រូវ ស្ថាបនាប៉ុស្តិ៍នគរបាលរដ្ឋបាល ការពារព្រំដែនទឹក ខាងលើនេះ គឺមានទំហំទទឹង ៨ម៉ែត្រ និងមានបណ្ដោយ ២០ម៉ែត្រ។
នាឱកាសនោះ លោកឧត្ដមសេនីយ៍ឯក ទូច ពលៈ ប្រធាននាយកដ្ឋាននគរបាល ការពារព្រំដែនទឹក មានប្រសាសន៍ថា ថ្នាក់ដឹកនាំស្ថាប័ននេះ តែងយកចិត្តទុកដាក់ ចំពោះសុវត្ថិភាព សន្តិសុខ នៅតំបន់លម្ហសមុទ្រ និងការពារ សន្តិសុខ សណ្តាប់ធ្នាប់ ក្នុងដែនសមុទ្រ ជូនសង្គមជាតិ ជាពិសេសការពារជលផលប្រយោជន៍ របស់ប្រជាពលរដ្ជ ក្នុងដែនសមុទ្រកម្ពុជា ដោយការទទួលខុសត្រូវខ្ពស់។ ជាងនេះទៀត ក៏បាន ពង្រឹងសមត្ថភាព របស់កងកម្លាំងការពារសន្តិសុខដែនទឹក មិនឲ្យមានបទល្មើសណាមួយកើតមានឡើង ក្នុងតំបន់សមុទ្រ ឬនៅតាមភូមិសាស្ត្រ នៃខេត្តជាប់មាត់សមុទ្រនីមួយៗនោះទេ។
លោកបន្តថា នាយកដ្ឋាននគរបាលការពារព្រំដែនទឹក នឹងបន្តចូលរួមសហការជាមួយ ប្រជានេសាទ ដើម្បីទប់ស្កាត់បទល្មើសផ្សេងៗ នៅតាមមាត់សមុទ្រ ឬនៅតាមកោះនីមួយៗ ដូចជាទប់ស្កាត់ នូវបទល្មើសនេសាទខុសច្បាប់គ្រប់ប្រភេទ ដែលជនខិលខូច លួចចូលមក នេសាទ ក្នុងដែនសមុទ្រ របស់ប្រទេសកម្ពុជា ឲ្យមានប្រសិទ្ធភាព៕
