អាជីវករឆ្នេរអូរឈើទាល ចាត់ទុកការផ្តល់សិទ្ធឲ្យក្រុមហ៊ុនឯកជន យកលុយពីភ្ញៀវទេសចរ ថ្លៃចតរថយន្ត នាំឲ្យភ្ញៀវមិនសប្បាយចិត្ត
ខេត្តព្រះសីហនុ ៖ ក្រុមអាជីវករ ដែលមានភោជនីយដ្ឋានលក់ដូរជាង ៤០ហាង មានទីតាំងនៅតាមឆ្នេរអូរឈើទាល ក្រុងព្រះសីហនុ បង្ហាញការមិនពេញចិត្ត ចំពោះការយកថ្លៃភាស៊ី ឬយកលុយចតរថយន្ត ពីភ្ញៀវទេសចរ ដែលចូលមកកម្សាន្តតាមតំបន់ឆ្នេរអូរឈើទាល ដោយចាប់អនុវត្ត កាលពីថ្ងៃទី០៦ ខែកុម្ភៈ ឆ្នាំ២០២៤ ថា នាំឲ្យអារម្មណ៍ របស់ភ្ញៀវទេសចរទាំងជាតិ-អន្តរជាតិ មិនសប្បាយចិត្ត ហើយលែងចង់មកទស្សនាខេត្តព្រះសីហនុទៀត នាថ្ងៃខាងមុខ។
ការលើកឡើង របស់តំណាងអាជីវករ ឆ្នេរអូរឈើទាលខាងលើនេះ កើតឡើងបន្ទាប់ពី កាលពីថ្ងៃទី០៥ ខែកុម្ភៈ លោក សរ កក្កដា អភិបាលក្រុងព្រះសីហនុ បានកោះប្រជុំតំណាងអាជីវករ ដែលមានតូប ឬហាងលក់ដូរ នៅតាមឆ្នេរអូរឈើទាល ជាបន្ទាន់ ហើយបានចេញសេចក្តីសម្រេចភ្លាមៗចំនួន ១០ចំណុច ឲ្យក្រុមអាជីវករឆ្នេរអូរឈើទាល អនុវត្ត ដោយគ្មានការតវ៉ា ឬមានមតិយោបល់ទេ។
តំណាងអាជីវករឆ្នេរអូរឈើទាល ឲ្យដឹងថា លទ្ធផលកិច្ចប្រជុំ ១០ចំណុច ដែលរដ្ឋបាលក្រុងព្រះសីហនុ តម្រូវឲ្យក្រុមអាជីវករឆ្នេរអូរឈើទាល អនុវត្តមានដូចជា ៖
១- តម្រូវឲ្យម្ចាស់តូប ឬភោជនីយដ្ឋាននៅឆ្នេរអូរឈើទាលទាំងអស់ ត្រូវប្រគល់ចំណតរថយន្តខាងមុខភោជនីយដ្ឋាន របស់ខ្លួន ទៅឲ្យក្រុមហ៊ុន ហោ យាន ដែលទទួលសិទ្ធធ្វើអាជីវកម្មភាស៊ីចំណតរថយន្ត នៅក្នុងក្រុងព្រះសីហនុ ដោយក្រុមហ៊ុននេះ ជាអ្នកគ្រប់គ្រងចាប់ពីថ្ងៃទី០១ ខែកុម្ភៈ ឆ្នាំ២០២៤តទៅ។ ហើយក្រុមហ៊ុន បានចុះកិច្ចសន្យាជាមួយក្រសួងសេដ្ឋកិច្ច សាកល្បងរយៈពេល០១ឆ្នាំ និងបានបង់ថវិកាចូលរដ្ឋបាលខេត្តព្រះសីហនុ ចំនួន១២ម៉ឺនដុល្លារអាមេរិក (១២០០០០ដុល្លារ)។ ភាស៊ីនេះ ត្រូវអនុវត្តចំពោះរថយន្ត ដែលចូលចតនៅមុខភោជនីយដ្ឋានទាំងអស់ នៅតាមឆ្នេរអូរឈើទាល ចាប់ពីថ្ងៃទី០៦ ខែកុម្ភៈ ឆ្នាំ២០២៤តទៅ។
២- សម្រាប់រថយន្តថៅកែហាង និងបុគ្គលិកហាង គឺតម្រូវឲ្យបង់លុយចំណតម្តង ក្នុងមួយថ្ងៃ គឺទៅតាមប្រភេទរថយន្ត ដែលក្រុមហ៊ុនបានកំណត់។
៣- សម្រាប់ម៉ូតូ របស់បុគ្គលិក ត្រូវបានលើកលែង គឺមិនយកលុយទេ។
៤- ម្ចាស់ហាង ឬភោជនីយដ្ឋាននីមួយៗ មិនត្រូវបង្កើតឲ្យមានបុគ្គលិក រង់ចាំហៅភ្ញៀវ ឬហៅឡាន ឲ្យចូលចត នៅតាមចំណតមុខហាង របស់ខ្លួនទៀតទេ។
៥- មិនអនុញ្ញាតឲ្យម្ចាស់ហាង ឬភោជនីយដ្ឋាន ធ្វើការចាក់សាប ឬបេតុង នៅតាមបរិវេណចំណតសាធារណៈទៀតឡើយ។
៥- តម្រូវឲ្យ ម្ចាស់ហាង ឬភោជនីយដ្ឋានទាំងអស់ ត្រូវបិតស្លាកសញ្ញាហាមជក់បារី នៅតាមទីតាំងរៀងៗខ្លួន។
៧- ម្ចាស់ហាងមិនត្រូវទទួលការដាក់តាំង ផលិតផលបារី ឬរូបភាពល្បែងស៊ីសង នៅក្នុងហាង ជាថ្នូរដោះដូរផលិតផលផ្សេងៗ ដូចជា ការតាំងរូបភាពផ្សព្វផ្សាយពីផលិតផល ឬទីតាំងប្រកបអាជីវកម្មអ្វីមួយទេ។
៨- ម្ចាស់ហាង ឬភោជនីយដ្ឋាននីមួយៗ ត្រូវគោរពទៅតាមពេលវេលាបញ្ចេញសំរាម ដែលរដ្ឋបាលក្រុងព្រះសីហនុ បានកំណត់។
៩- ម្ចាស់ហាង ឬភោជនីយដ្ឋានទាំងអស់ ត្រូវរៀបចំផ្លូវដើរសាធារណៈ ឲ្យមានសណ្ដាប់ធ្នាប់។
១០- ម្ចាស់ហាង ឬភោជនីយដ្ឋាននីមួយៗ មិនត្រូវរំលោភចំណីផ្លូវ និងឆ្នេរសមុទ្រ របស់រដ្ឋ សម្រាប់បម្រើដល់ការធ្វើអាជីវកម្ម របស់ខ្លួនទេ។
បញ្ហាទាំង ១០ចំណុចនេះ ទើបនៅរសៀលថ្ងៃអង្គារ ទី០៦ ខែកុម្ភៈ តំណាងអាជីវករដែលមានភោជនីយដ្ឋាន នៅឆ្នេរអូរឈើទាលទាំងអស់ ក៏បានប្រមូលផ្តុំគ្នាតវ៉ា និងផ្តិតស្នាមមេដៃ ត្រៀមដាក់ជូន លោកឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងដែនដី នគរូបនីយកម្ម និងសំណង់ និងជាប្រធានគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា និងលោក គួច ចំរើន អភិបាលខេត្តព្រះសីហនុ ដើម្បីពិនិត្យ និងជួយអន្តរាគមន៍។
ត្រង់ចំណុចនេះ ក្រុមអាជីវករទាំង ៤៣ហាង នៅឆ្នេរអូរឈើទាល បានលើកឡើងដូចៗគ្នាថា អាជីវករពួកគេ បានចំណាយលុយរាប់រយដុល្លារប្រចាំខែ សម្រាប់បង់ជូនមន្ទីរអង្គភាពពាក់ព័ន្ធជាច្រើនស្ថាប័ននៃខេត្តព្រះសីហនុ។ ក្នុងនោះ ក៏បានបង់ជូន រដ្ឋបាលខេត្តព្រះសីហនុ ចំនួន ៧០០ដុល្លារ ក្នុងមួខែ សម្រាប់ភោជនីយដ្ឋានមួយកន្លែង។
កាលពីរសៀលថ្ងៃអង្គារ ទី០៦ ខែកុម្ភៈ មានតំណាងអាជីវករចំនួន ២៣នាក់ បានមកប្រមូលផ្តុំគ្នានៅឆ្នេរអូរឈើទាល ដើម្បីសម្តែងមតិ និងបង្ហាញការមិនពេញចិត្តចំពោះទង្វើ របស់មន្ត្រីក្រសួងស្ថាប័នពាក់ព័ន្ធ ក៏ដូចជារដ្ឋបាលក្រុង-ខេត្តព្រះសីហនុ ដែលបានផ្តល់សិទ្ធធ្វើអាជីវកម្មភាស៊ីចំណតរថយន្ត ទៅឲ្យក្រុមហ៊ុន ហោ យាន ទាំងមិនបានសួរនាំ ឬជូនដំណឹងមកក្រុមអាជីវករពួកគាត់ ដឹងជាមុន ឬមានកោះប្រជុំក្រុមអាជីវករ ដើម្បីចូលរួមជាមតិយោបល់ ជាសាធារណៈនោះទេ។ ទើបមកកោះប្រជុំក្រុមអាជីវករពួកគាត់យ៉ាងតក់ក្រហល់ កាលពីថ្ងៃទី០៥ ខែកុម្ភៈ។ ហើយក្រោយបញ្ចប់កិច្ចប្រជុំភ្លាមៗ ក៏បានដាក់ចេញសេចក្តីសម្រេចចំនួន ១០ចំណុច ឲ្យពួកគាត់អនុវត្តតាមភ្លាមៗ ដោយគ្មានការតវ៉ា។
អាជីវករឆ្នេរអូរឈើទាលឲ្យដឹងបន្តថា «រសៀលថ្ងៃអង្គារនេះ អាជីវករចំនួន ២៣នាក់ តំណាងឲ្យភោជនីយដ្ឋានចំនួន ៤៣ហាង នៅឆ្នេរអូរឈើទាល បានជួបជុំគ្នា សម្តែងមតិមិនពេញចិត្ត ចំពោះការយកភាស៊ី ឬយកលុយថ្លៃចំណតពីភ្ញៀវទេសចរ ចូលមកកម្សាន្តនៅឆ្នេរអូរឈើទាល។ ពួកគាត់ ចាត់ទុកការយកភាស៊ីចំណត របស់ក្រុមហ៊ុន ហោ យាន អាចនាំឲ្យភ្ញៀវទេសចរមិនសប្បាយចិត្ត ឬបាត់បងភ្ញៀវចូលមកទស្សនាខេត្តព្រះសីហនុទៀត នាថ្ងៃខាងមុខ»។
ក្រុមអាជីវករ បញ្ជាក់បម្ថែមថា ជំនួបរបស់ក្រុមអាជីវករនៅរសៀលថ្ងៃអង្គារ ពួកគាត់បានផ្តិតស្នាមមេដៃ ដើម្បីរៀបចំឯកសារដាក់ញាតិជូន លោកឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងដែនដី នគរូបនីយកម្ម និងសំណង់ និងជាប្រធានគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា និងថ្នាក់ដឹកនាំរដ្ឋបាលខេត្តព្រះសីហនុ ឲ្យជួយអន្តរាគន៍ បញ្ឈប់សកម្មភាព របស់ក្រុមហ៊ុនឯកជន កុំឲ្យយកចំណតចតរថយន្ត ពីភ្ញៀវទេសចរ នៅឆ្នេរអូរឈើទាលទៀត។
ដោយឡែក អាជីវករឆ្នេរអូរឈើទាលច្រើនទៀត ក៏បានបង្ហាញការមិនពេញចិត្ត ចំពោះការយកលុយថ្លៃចំណតពីភ្ញៀវទេសចរ ថ្លៃចតរថយន្តនេះដែរ ហើយបានសម្តែងការហួសចិត្តថា «មិនគួរនៅសុខៗ បែរជាថ្នាក់ដឹកនាំរដ្ឋបាលក្រុងព្រះសីហនុ ឬក្រសួងពាក់ព័ន្ធ ផ្តល់សិទ្ធទៅឲ្យក្រុមហ៊ុនឯកជន ធ្វើអាជីវកម្មភាស៊ី ឬយកពីភ្ញៀវទេសចរថ្លៃចតរថយន្តបែបនេះទេ។ នៅសុខៗ ទៅបង្កើតរឿងក្តៅក្រហាយដល់ភ្ញៀវទេសចរ ខណៈសេដ្ឋកិច្ចក្នុងខេត្តនេះ កំពុងធ្លាក់ចុះដុនដាបស្រាប់ ហើយអាជីវករពួកគាត់ បានរិះរកវិធីសាស្ត្រ ដើម្បីអភិវឌ្ឍហាង ឬទីតាំងភោជនីយដ្ឋានតែរៀងៗខ្លួន ដើម្បីទាក់ទាញភ្ញៀវទេសចរ ឲ្យចូលមកទស្សនាតំបន់ឆ្នេរនេះ បានកាន់តែច្រើន។ ប៉ុន្តែបែរជា ថ្នាក់ដឹកនាំក្រសួង ក៏ដូចជា រដ្ឋបាលក្រុងព្រះសីហនុ មកបង្កើតឲ្យមានក្រុមហ៊ុនមកយកភាស៊ី ថ្លៃចតរថយន្តពីភ្ញៀវទេសចរបែបនេះទៅកើត។ ព្រោះការយកលុយថ្លៃចំណតពីភ្ញៀវទេសចរ អាចធ្វើឲ្យភ្ញៀវ មិនសប្បាយចិត្ត ហើយមិនចង់ចូលមកកម្សាន្តខេត្តព្រះសីហនុទៀត ក៏ថាបានដែរ»។
ទាក់ទិនបញ្ហានេះ ភ្ញៀវទេសចរមួយក្រុម ដែលចូលមកកម្សាន្ត និងអង្គុយពិសាអាហារជុំគ្នា នៅតាមហាងមួយចំនួន នាឆ្នេរអូរឈើទាល ក៏បានរិះគន់ក្រុមហ៊ុនយកភាស៊ី ឬយកលុយថ្លៃចតរថយន្តរបស់ខ្លួនថា « ខ្ញុំ ចូលមកដល់មិនទាន់បានចតឡានត្រឹមត្រូវ និងមិនទាន់បានចូលហាង ហូបអីមួយម៉ាត់ផង ក៏មានគេមកតម្រូវឲ្យរូបគាត់បង់លុយ ៦ពាន់រៀល ថ្លៃចតរថយន្តជាមុន។ ពួកខ្ញុំ មិនសប្បាយចិត្តទេ សូមឲ្យចៅហ្វាយខេត្តព្រះសីហនុ ពិចារណាឡើងវិញផង ថាគួរបន្តបង្កើតទង្វើបង្ខំ យកលុយពីការចតរថយន្ត ឬថ្លៃភាស៊ី តាមតែអំពើចិត្តបែបនេះ តទៅទៀត ឬយ៉ាងណា នៅថ្ងៃអនាគត?។ ព្រោះ សេដ្ឋកិច្ចស្រុកទេសយើង ក៏កំពុងធ្លាក់ចុះ ហើយពលរដ្ឋមិនសូវ មានលុយដើរលេងផងទេ។ សូមកុំឲ្យខេត្តជាប់សមុទ្រមួយនេះ កើតមានរឿងប្លែកៗច្រើនពេក»។
បុរសជាភ្ញៀវទេសចរផ្សេងទៀត ដែលស្នើមិនបង្ហាញអត្តសញ្ញាណ ក៏បានថ្លែងរិះគន់លើការយកភាស៊ី ឬយកលុយថ្លៃចតរថយន្ត ពីក្រុមហ៊ុននៅឆ្នេរអូរឈើទាល មានតម្លៃខ្ពស់រហូតដល់ ៦ពាន់រៀល ក្នុងរថយន្តមួយគ្រឿង។ ហើយតម្លៃនេះ ហាក់មានលក្ខណៈចាប់បង្ខំ ហើយអ្នកមកយកលុយថ្លៃចំណត ហាក់គ្មានសុវជីវធម៌នោះទេ ដោយរថយន្តរបស់គាត់ ស្ទើរមិនទាន់ឈប់វិលកង់ផង បានមកហុចក្រដាសវិក័យបត្រ តម្រូវឲ្យបង់លុយភ្លាមៗ។ លោកបន្តថា កន្លងមក នៅពេលរូបគាត់ នាំក្រុមគ្រួសារសាច់ញាតិ ចូលមកកម្សាន្តនៅតាមភោជនីយដ្ឋាន តាមបណ្តោយឆ្នេរអូរឈើទាលនេះ គឺរាល់ការចតរថយន្ត របស់គាត់ មិនតម្រូវឲ្យបង់លុយនោះទេ ពោលគឺទើបតែ នៅសៀលថ្ងៃទី០៦ ខែកុម្ភៈនេះប៉ុណ្ណោះ។
ភ្ញៀវទេសចររូបនេះបន្តថា «រសៀលថ្ងៃអង្គារនេះ ពេលគាត់បើកឡើនមកចតនៅតាមចំណត ដែលម្ចាស់ភោជនីយដ្ឋាន បានចាក់សាបបេតុងយ៉ាងមានសោភ័ណភាពរាបស្មើ គឺរូបគាត់មិនទាន់ទាំងបានចុះពីរថយន្តផង ក៏មានមនុស្សម្នាក់ បានហែកវិក័យបត្របង់លុយថ្លៃចំណតចំនួន ៦ពាន់រៀល ក្នុងរថយន្តមួយគ្រឿង ដែលពីមុនរាល់ការចត នៅមុខហាងនីមួយៗ នៅតាមឆ្នេរអូរឈើទាលនេះ មិនតម្រូវឲ្យម្ចាស់រថយន្តបង់លុយថ្លៃចំណតនោះទេ ហើយថែមទាំងមានបុគ្គលិក នៅតាមហាងនីមួយៗ ចេញមកជួយសម្រួល ការចូលចតរថយន្តយ៉ាងសមរម្យថែមទៀតផង។ ប៉ុន្តែពេលនេះ គីមិនដូចពេលមុនទៀតទេ»។
ងាកមកស្ត្រីភ្ញៀវទេសចរម្នាក់ទៀត ដែលបាននាំក្រុមគ្រួសារចូលមក សម្រាក់អង្គុយលម្ហែ និងពិសាម្ហូបអាហារភោជនីយដ្ឋានមួយកន្លែង នៅចុងឆ្នេរអូរឈើទាល ក៏បានរអ៊ូរទាំថា «គ្រាន់តែឡានបើកចូលដល់មុខហាង ស្ទើរមិនទាន់ឈប់វិលកង់ផង ក៏មានមនុស្សហែកក្រដាសវិក័យបត្រតម្រូវឲ្យបង់លុយ ៦ពាន់រៀល ទាំងមិនទាន់បានចុះពីឡាន ចូលអង្គុយ ហូបម្ហូបអាហារយម៉ាតផង។ ឳ អនិច្ចាខេត្តមុខលុយអើយ អីក៏មុខខ្លាញ់យ៉ាងនេះ ? ហេតុអ្វីចៅហ្វាយខេត្តមិនជួយមើលផង ឬមួយក៏ជាអ្នកនៅពីក្រោយ ការយកភាស៊ី ចំណតនេះទេដឹង?។ គួរឲ្យខ្លាចរអារលែងហ៊ាន មកទស្សនាតំបន់ឆ្នេរនេះទៀតហើយ»។
លោក តាំង សុចិត្រគ្រឹះស្នា ប្រធានមន្ទីរទេសចរណ៍ ខេត្តព្រះសីហនុ មានប្រសាសន៍ថា « ចំពោះការយកភាស៊ីពីភ្ញៀវទេសចរ ដែលចូលត្តរថយន្តនៅតាមឆ្នេរអូរឈើទាលនេះ រូបលោកមិនបានដឹងរឿងច្បាស់ទេ ដោយគ្រានតែឮអាជីវករនិយាយតែប៉ុណ្ណោះ។ ប៉ុន្តែក្នុងមានមន្ទីរទេសចរណ៍យល់ថា ជាធម្មតាទេ ការរៀបចំប្រមូលថវិកា ឬក៏ភាស៊ីពីតំបន់សាធារណៈ របស់រដ្ឋ គឺជារឿងធម្មតាទេ ប្រសិនបើមានគោលការណ៍ណែនាំ និងមានលិខិតបទដ្ឋានត្រឹមត្រូវ ពីក្រសួងពាក់ព័ន្ធ ឬក៏សមត្ថកិច្ចពាក់ព័ន្ធ។ ប៉ុន្តែអ្វីដែលសំខាន់ ខ្ញុំ ក៏បានឮព័ត៌មានខ្លះដែរ គួរឲ្យមានការប្រជុំពិភាក្សាគ្នាជាមួយភាគីពាក់ព័ន្ធ ឲ្យមានការឯកភាពគ្នាជារួមជាមុនសិន ដើម្បីជៀសវាងកើតមានបាតុភាពផ្សេងៗ»។
ករណីនេះ លោក គ្រឹះស្នា បង្ហាញគំនិតថា «បច្ចុប្បន្នេះ យើងកំពុងជម្រុញដល់ក្រុមអាជីវករ ឲ្យចូលរួមបង្កើតព្រឹត្តិការណ៍ដើម្បីទាក់ទាញភ្ញៀវទេសចរ ឲ្យចូលមកទស្សនាតំបន់ឆ្នេរសមុទ្រ របស់យើងឲ្យបានច្រើន ប៉ុន្តែបើយើងធ្វើអ្វីមួយ ហើយលើកយកមកអនុវត្តភ្លាមៗ ដោយមិនឲ្យអាជីវករបានដឹង និងត្រៀមខ្លួនជាមុនគឺនឹងអាចមានបញ្ហាកើតឡើង។ ការធ្វើអ្វីមួយទាល់តែ ផ្នែកពាក់ព័ន្ធ ព្រមទទួលយកលទ្ធផលឈ្នះឈ្នះទាំងអស់គ្នា ទើបមិនមានបញ្ហាអីកើតទេ។ ជាពិសេសករណីយកភាស៊ីចំណតភ្លាមៗនេះ វាអាចនាំឲ្យប៉ះពាល់ដល់សតិអារម្មណ៍ របស់ភ្ញៀវទេសចរ ដែលគាត់ធ្លាប់ចូលមកកម្សាន្តនៅឆ្នេរអូរឈើទាល ហើយមិនធ្លាប់មានអ្នកយកលុយចំណត ប៉ុន្តែដល់ពេលមានអ្នកយកលុយចំណត អាចធ្វើឲ្យគាត់មិនសប្បាយចិត្តដែរ។ ខ្ញុំថា ករណីយកភាស៊ីចំណតនេះ គឺគួរទុកពេលវេលា និងធ្វើកការផ្សព្វផ្សាយឲ្យអាជីវករ និងសាធារណជន បានដឹងជាមុនសិន ទើបជាការល្អប្រសើរ»។
យ៉ាងណា មិនទាន់អាចទាក់ទង តំណាងក្រុមហ៊ុន ហោ យាន ដែលទទួលបានសិទ្ធធ្វើអាជីវកកម្មភាស៊ីចំណតរថយន្ត នៅឆ្នេរអូរឈើទាល នៅឡើយទេ នៅល្ងាចថ្ងៃទី០៦ ខែកុម្ភៈ ឆ្នាំ២០២៤។
ឆ្លើយតបបញ្ហានេះ លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ បានបញ្ជាក់ថា ទាក់ទងនីតិវីធីដេញថ្លៃចំណតរថយន្តនៅឆ្នេរអូរឈើទាលនេះ គឺធ្វើឡើងស្របច្បាប់ រៀបចំដោយរដ្ឋបាលខេត្តព្រះសីហនុ។ ហើយទទួលបានចំណូលចូលរដ្ឋ ក្នុងមួយឆ្នាំជាង ១០ម៉ឺនដុល្លារ តាមរយៈបង់ថវិកានេះចូល រដ្ឋបាលខេត្តព្រះសីហនុ។
លោកបន្តថា ការយកភាស៊ីចំណតនេះ ចាប់អនុវត្តពីថ្ងៃទី០៦ ខែកុម្ភៈតទៅ រហូតដល់ដាច់ឆ្នាំ២០២៤។ សូមឲ្យអាជីវករលក់ដូរនៅឆ្នេរអូរឈើទាលទាំងអស់ ចូលរួមសហការជាមួយរដ្ឋបាលក្រុង និងរដ្ឋបាលខេត្តព្រះសីហនុ ដោយស្មារតីយោគយល់គ្នា។
លោក ឃាង ភារម្យ សំណូមពរថា «សូមឲ្យអាជីវករមានហាងលក់ដូរនៅឆ្នេរអូរឈើទាលទាំងអស់ ឈប់បន្តការវាទី លើទីតាំងដីសាធារណៈ របស់រដ្ឋ ដើម្បីបម្រើប្រយោជន៍ផ្ទាល់ខ្លួនតទៅទៀត ដោយអាជីវករទាំងនោះ ងាកមកខំប្រឹងតែបំរើសេវាជូនភ្ញៀវ នៅក្នុងហាងរបស់ខ្លួន ឲ្យបានល្អវាជាការស្រេច។ កាលណា តំបន់ឆ្នេរអូរឈើទាលនេះ មានចំណតល្អ មានសុវត្ថិភាព គឺភ្ញៀវក៏សប្បាយចិត្ត និងចូលមកតំបន់នេះកាន់តែច្រើនថែមទៀត វាមិនមែនជាប៉ះទង្គិចសតិអារម្មណ៍ដល់ភ្ញៀវទេសចរទេ។
លោកបន្តថា ចំពោះការយកភាស៊ីថ្លៃចំណតរថយន្តនេះ គឺខាងក្រុមហ៊ុន បានកំណត់តម្លៃច្បាស់លាស់ ដោយបែងចែកប្រភេទរថយន្តតូចធំ មានតម្លៃ ៤ពាន់រៀល ៦ពាន់ និង៨ពាន់រៀល គឺតម្លៃនេះទៅតាមរថយន្តតូចឬធំ។ ហើយ វាមិនប៉ះទង្គិចអ្វីដល់ភ្ញៀវទេ ជាពិសេសការយកភាស៊ីចំណតនេះ ខាងក្រុមហ៊ុន មានការទទួលខុសត្រូវ ទៅលើការខូចខាត ឬបាត់បង់ រថយន្តរបស់ភ្ញៀវថែមទៀតផង»។
យ៉ាងណាក៏ដោយចុះ អភិបាលក្រុងព្រះសីហនុ លោក សរ កក្កដា មានប្រសាសន៍នៅរសៀលថ្ងៃអង្គារនេះថា ក្រុមហ៊ុនដែលដេញថ្លៃធ្វើអាជីវកម្មភាស៊ី ចំណតរថយន្ត នៅឆ្នេរអូរឈើទាលនេះ គឺដាក់ពាក្យដេញថ្លៃស្របតាមច្បាប់ ដែលរៀបចំដោយ រដ្ឋបាលខេត្តព្រះសីហនុ និងទទួលស្គាល់ដោយ ក្រសួងសេដ្ឋកិច្ច និងហិរញ្ញវត្ថុ ក៏ដូចជាមន្ទីរសេដ្ឋកិច្ច ខេត្តព្រះសីហនុ ស្របតាមនីតិវិធី។ ហើយក្រុមហ៊ុនដេញថ្លៃបាន ឬទទួលសិទ្ធស្របច្បាប់ ក្នុងការធ្វើអាជីវកម្មភាស៊ីចំណតថយន្ត ក្នុងក្រុងព្រះសីហនុនេះ គឺឈ្មោះក្រុមហ៊ុន ហោ យាន ដោយទទួលសិទ្ធធ្វើអាជីវកម្មរយៈពេល ០១ឆ្នាំ ចាប់ពីថ្ងៃទី០១ ខែមករា ដល់ថ្ងៃទី៣១ ខែធ្នូ ឆ្នាំ២០២៤។ ហើយការយកថ្លៃភាស៊ីចំណតរថយន្តនេះ មានធ្វើក្នុងកិច្ចសន្យា រវាងក្រុមហ៊ុន រដ្ឋបាលខេត្ត ក៏ដូចជាមន្ទីរជំនាញ និងអាជ្ញាធររដ្ឋបាលក្រុង ស្របតាមច្បាប់។
លោកអភិបាលក្រុងព្រះសីហនុ បន្តថា «ការយកថ្លៃភាស៊ីចំណតរថយន្ត នៅឆ្នេរអូរឈើទាលនេះ គឺតម្រូវឲ្យគ្រប់ម្ចាស់ហាង ឬភោជនីយដ្ឋានទាំងអស់ ត្រូវតែអុវត្តតាម និងចូលរួមសហការ ឲ្យស្របតាមសេចក្តីសម្រេចទាំង ១០ចំណុច ដែលរដ្ឋបាលក្រុងព្រះសីហនុ បានដាក់ចេញ នៅក្នុងកិច្ចប្រជុំជាមួយក្រុមអាជីវករឆ្នេរអូរឈើទាល កាលពីថ្ងៃទី០៥ ខែកុម្ភៈ ឲ្យបានរលូន ដោយមិនត្រូវប្រមូលផ្តុំគ្នាតវ៉ាទេ ព្រោះថវិកា ដែលទទួលបានពីការដេញថ្លៃភាស៊ីនេះ ក៏បានជួយដល់ចំណូលថវិកាខេត្តព្រះសីហនុ ជាង ១០ម៉ឺនដុល្លារដែរក្នុងមួយឆ្នាំ»។
យ៉ាងនេះក្តី តំណាងអាជីវករទាំង ៤៣ហាង ឬភោជនីយដ្ឋាន នៅឆ្នេរអូរឈើទាល នឹងរង់ចាំមើលលទ្ធផលនៃចំណាត់ការ របស់ លោក គួច ចំរើន អភិបាលខេត្តព្រះសីហនុ ដែលពួកគេបានដាក់ញាតិសុំឲ្យជួយអន្តរាកមន៍ស្នើលុបចោល សកម្មភាព របស់ក្រុមហ៊ុន ហោ យាន ដែលយកថ្លៃចតរថយន្តពីភ្ញៀវទេសចរ នៅឆ្នេរអូរឈើទាល ដោយរំពឹងថា នឹងទទួលបានលទ្ធផលវិជ្ជមានឆាប់ៗនេះ ខណៈសំណើរ និងស្នាមមេដៃអាជីវករពួកគាត់ នឹងត្រៀមដាក់ជូន នៅថ្ងៃពុធ ទី០៧ ខែកុម្ភៈ ឆ្នាំ២០២៤នេះ៕