គ្រួសារពលរដ្ឋ ដោយភ្លើងឆេះផ្ទះ រង់ចាំការជួយអន្តរគមន៍ពី អាជ្ញាធរខេត្តមណ្ឌលគិរី
ខេត្តមណ្ឌលគិរី៖ គ្រួសារជនរងគ្រោះដោយភ្លើងឆេះផ្ទះ កាលពី ៤ថ្ងៃមុន ពុំទាន់មានលទ្ធភាពសង់កន្លែងស្នាក់នៅឡើងវិញទេ ខណៈអាជ្ញាធរមូលដ្ឋានភូមិស្រែអណ្តោល ឃុំស្រែឈូក ស្រុកកែវសីមា កំពុងស្នើរសុំការជួយអន្តរាគមន៍ទៅមន្ត្រីថ្នាក់លើ ដើម្បីស្នើជួយសម្រួលដល់គ្រួសាររងគ្រោះ បានដាក់ម៉ាសុីកាត់ឈើចូលទៅក្នុងព្រៃ ដើម្បីអារឈើសង់ផ្ទះរស់នៅឡើងវិញ។
ទាក់ទិនបញ្ហានេះ លោក ឌិន សុខា មេភូមិស្រែអណ្តោល បានឲ្យដឹងថា បច្ចុប្បន្នស្ថានភាពជាក់ស្ដែង របស់ គ្រួសារឈ្មោះ ញីន ខេង រស់នៅភូមិស្រែអណ្តោល ឃុំស្រែឈូក ស្រុកកែវសីមា ខេត្តមណ្ឌលគិរី ត្រូវបានអគ្គិភ័យឆេះផ្ទះ ទាំងស្រុង កាលពីថ្ងៃទី១០ ខែកុម្ភៈ ឆ្នាំ២០២៤ ដែលមានសមាជិកសរុប ០៣នាក់ គឺរហូតមកដល់ពេលនេះ នៅពុំមានកន្លែងស្នាក់នៅទេ ដោយពួកគាត់កំពុងស្នាក់នៅបណ្តោះអាសន្ន ជាមួយជាមួយអ្នកភូមិជាមួយគ្នា។
លោក ឌិន សិខា បន្តថា ក្នុងនាមមេភូមិ សូមស្នើរដល់អាជ្ញាធរថ្នាក់លើ និងមន្ត្រីជំនាញ ធ្វើយ៉ាងណាជួយសម្រួលដល់គ្រួសារជនរងគ្រោះ បានចូលកាត់ឈើក្នុងព្រៃ ដើម្បីយកឈើធ្វើផ្ទះឡើងវិញផង។
ចំណែក លោក សុះ មីឡែម អភិបាលរងស្រុកកែវសីមា បានបញ្ជាក់ពេលចុះសួរសុខទុក្ខ គ្រួសារដែលភ្លើងឆេះផ្ទះ នាពេលថ្មីៗនេះថា អាជ្ញាធរស្រុកកែវសីមា និងជួយសម្រួលដល់គ្រួសារជនរងគ្រោះ ដែលត្រូវភ្លើងឆេះនេះ។
គួរបញ្ជាក់ថា ករណីអគ្គិភ័យនេះ មិនបណ្ដាលឲ្យគ្រោះថ្នាក់ដល់អាយុជីវិតមនុស្សទេ ហើយភ្លេីងបានឆេះផ្ទះចំនួន ០១ខ្នង មានដំបូលប្រកក្បឿង និងឆេះសម្ភារៈក្នុងផ្ទះអស់មួយចំនួនធំ។ ចំពោះមូលហេតុបណ្តាលឲ្យមានភ្លើងឆេះ គឺដោយសារភ្លើងចង្ក្រាន ចេញពីម្ចាស់ផ្ទះ ឈ្មោះ ញីន ខេង ប្រពន្ធឈ្មោះ ដេត ចាន់ណាវង។
ដោយឡែក កាលពីថ្ងៃទី១៣ ខែកម្ភៈ អាជ្ញាធរស្រុកកែវសីមា ដឹកនាំដោយ លោក សុះ មីឡែម ជាអភិបាលរង បានចុះយកជំនួយសង្គ្រោះបឋម យកទៅចែកជូនគ្រួសារជនរងគ្រោះខាងលើផងដែរ៕