អភិបាលខេត្តត្បូងឃ្មុំ ចុះសួរសុខទុក្ខកងកម្លាំង កំពុងឈរជើងការពារបទល្មើស ឈូសឆាយទន្ទ្រានតំបន់ដីព្រៃលិចទឹក ក្នុងស្រុកក្រូចឆ្មារ
ខេត្តត្បូងឃ្មុំ ៖ អភិបាលខេត្តត្បូងឃ្មុំ ព្រមានចាត់វិធានការតាមផ្លូវច្បាប់ ឲ្យបានធ្ងន់ធ្ងរទៅលើជនទាំងឡាយណា ដែលមានមហិច្ឆិតា ចូលទៅធ្វើសកម្មភាពទន្ទ្រានឈូសឆាយរានយកដីព្រៃលិចទឹក ស្ថិតក្នុងភូមិសាស្ត្រស្រុកក្រូចឆ្មារ យកធ្វើកម្មសិទ្ធិដោយខុសច្បាប់។
អភិបាល នៃគណៈអភិបាលខេត្តត្បូងឃ្មុំ លោក ជាម ច័ន្ទសោភ័ណ បានដឹកនាំក្រុមការងារគណៈកម្មាការទប់ស្កាត់ ការឈូសឆាយទន្រ្ទានដីព្រៃលិចទឹកខេត្ត ចុះជួបសួរសុខទុក្ខ ព្រមទាំងនាំយកស្បៀងអាហារ បន្លែ ត្រីសាច់ និងថវិកាមួយចំនួន ទៅឧបត្ថម្ភជូនកងកម្លាំងប្រដាប់អាវុធចម្រុះ ដែលកំពុងឈរជើងនៅមូលដ្ឋានចំនួន ៤ទីតាំង នៅតំបន់ដីព្រៃលិចទឹកចំណុចក្របីក្រៀគ ក្នុងភូមិសាស្ត្រស្រុកក្រូចឆ្មារ ខេត្តត្បូងឃ្មុំ។ សកម្មភាពនេះ ធ្វើឡើងនៅថ្ងៃទី១៥ ខែកុម្ភៈ ឆ្នាំ២០២៤ បន្ទាប់មក ក៏បានចុះជួបសួរសុខទុក្ខ ជាមួយប្រជាពលរដ្ឋ រស់នៅមូលដ្ឋានខាងលើផងដែរ។
នាឱកាសនោះ លោក ជាម ច័ន្ទសោភ័ណ ក៏បាននាំយកការសាកសួរសុខទុក្ខពីសំណាក់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងអរគុណចំពោះកង កម្លាំងចម្រុះទាំងអស់ ដែលកំពុងឈរជើងការពារ បទល្មើសទន្ទ្រានព្រៃលិចទឹក នៅតាមគោលដៅរៀងៗខ្លួន។ ទោះបីទីតាំងទាំងនោះ មានភាពស្មុគស្មាញ និងមានការលំបាកបែបណាក្តី ប៉ុន្តែកងកម្លាំងចម្រុះទាំងអស់ បានបន្តខិតខំបំពេញការងារ ប្រកបដោយការទទួលខុសត្រូវខ្ពស់ ដើម្បីរួមគ្នាការពារតំបន់ព្រៃលិចទឹកទាំងនោះ ឲ្យនៅគង់យូរអង្វែង ទុកសម្រាប់តកូនចៅជំនាន់ក្រោយ។
លោកអភិបាលខេត្តបន្តថា ពាក់ព័ន្ធនឹងដីអភិរក្ស នៅតាមបណ្តាខេត្តជុំវិញបឹងទន្លេសាបនេះ រាជរដ្ឋាភិបាល ក៏ធ្លាប់បានកាត់ឆ្វៀលជូនប្រជាពលរដ្ឋរួចរាល់ហើយ សម្រាប់ទីតាំងអាស្រ័យផលជាក់ស្តែង។ ទន្ទឹមគ្នានេះ រាជរដ្ឋាភិបាល ក៏បានហាមដាច់ខាត មិនឱ្យមានការឈូសឆាយទន្ទ្រានដីព្រៃលិចទឹក នៅមូលដ្ឋានស្រុកក្រូចឆ្មារទៀតទេ។ ព្រៃលិចទឹក ជាជម្រកសម្រាប់ត្រីពងកូន ដ៏មានសារៈសំខាន់ នៅក្នុងរដូវវស្សា ហើយបើដីព្រៃលិចទឹកទាំងនេះ ត្រូវបាត់បង់ គឺក៏នឹងប៉ះពាល់ដល់ជីវៈចម្រុះជាច្រើនប្រភេទ នៅក្នុងបឹងទន្លេសាប។
បន្ថែមលើនេះ លោកអភិបាលខេត្តត្បូងឃ្មុំ ក៏បានជម្រុញដល់កម្លាំងចម្រុះទាំងអស់ ត្រូវសហការគ្នាចុះល្បាតជាប្រចាំ នៅតាមគោលដៅនីមួយៗ ធ្វើយ៉ាងណាតាមដានរាល់សភាពការណ៍ នៃការលបលួចឈូសឆាយទន្រ្ទានដីព្រៃលិចទឹ កដែលជាសម្បត្តិរបស់រដ្ឋនេះ ២៤ម៉ោងលើ២៤ម៉ោង នៅតាមគោលដៅដែលខ្លួនទទួលខុសត្រូវ។ ជាងនេះ ប្រសិនបើមានការប្រព្រឹត្តបទល្មើសជាក់ស្តែង គឺត្រូចាប់ខ្លួនជនល្មើសភ្លាមៗ និងកសាងសំណុំរឿងបញ្ជូនទៅតុលាការផ្តន្ទាទោស។
យ៉ាងណាក៏ដោយចុះ លោក ជាម ច័ន្ទសោភ័ណ បញ្ជាក់ថា សម្រាប់ប្រជាពលរដ្ឋទាំងឡាយណា ដែលគ្មានដីពិតប្រាដក សូមទាក់ទងជាមួយអាជ្ញាធរមូលដ្ឋាន របស់ខ្លួន ដើម្បីរាយការណ៍មករដ្ឋបាលខេត្ត និងរៀបចំដីកន្លែងណាមួយ សម្រាប់ចែកជូនប្រជាពលរដ្ឋ ឲ្យបានទាន់ពេលវេលា ប៉ុន្តែហាមដាច់ខាត់មិន ឲ្យចូលមកទន្ទ្រានដីព្រៃលិចទឹកជាដាច់ខាត។
លោកអភិបាល ក៏បានអំពាវនាវដល់ អាជ្ញាធរមូលដ្ឋាន ក៏ដួចជាប្រជាពលរដ្ឋ រស់នៅតាមមូលដ្ឋាននីមួយៗ ត្រូវរួមគ្នាជួយការពារ និងទប់ស្កាត់រាល់សកម្មភាពចូលទន្ទ្រានតំបន់ដីព្រៃលិចទឹក នៅក្នុងភូមិសាស្ត្រស្រុកក្រូចឆ្មារនេះ ឲ្យបានទាំងអស់គ្នា ដើម្បីអភិរក្សធនធានធម្មជាតិ និងជីវសាស្ត្រចម្រុះនានា ឱ្យបានគង់វង្ស ទុកសម្រាប់បម្រើជាឧត្តមប្រយោជន៍សាធារណៈនាថ្ងៃអនាកត៕
