សាលាដំបូងខេត្តព្រះសីហនុ សម្រេចផ្តន្ទាទោសជនជាតិចិនតៃវ៉ាន់២នាក់ ដាក់ពន្ធនាគារ២ឆ្នាំ ពីបទផលិតវីដេអូ ញុះញង់បង្កឲ្យមានភាពវឹកវរធ្ងន់ធ្ងរ ដល់សន្តិសុខសង្គម
ខេត្តព្រះសីហនុ៖ អយ្យការអមសាលាដំបូង ខេត្តព្រះសីហនុ បានសម្រេចផ្តន្ទាទោសជនជាតិចិនតៃវ៉ាន់ ចំនួន ០២នាក់ ដាក់ពន្ធនាគារក្នុងម្នាក់ៗចំនួន ០២ឆ្នាំ និងពិន័យប្រាក់ក្នុងម្នាក់ៗចំនួន ០៤លានរៀល ពីបទញុះញង់បង្កឱ្យមានភាពវឹកវរធ្ងន់ធ្ងរ ដល់សន្តិសុខសង្គម ប្រព្រឹត្តនៅភូមិ៦ សង្កាត់លេខ៤ ក្រុង-ខេត្តព្រះសីហនុ កាលពីថ្ងៃទី១៣ ខែកុម្ភៈ ឆ្នាំ២០២៤ ដែលជាបទល្មើស មានបញ្ញត្តិឱ្យផ្តន្ទាទោសតាមមាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌ។
សេចក្តីប្រកាសព័ត៌មាន របស់អ្នកនាំពាក្យសាលាដំបូង និងអយ្យការអមសាលាដំបូង ខេត្តព្រះសីហនុ ចុះថ្ងៃទី១៥ ខែកុម្ភៈ ឆ្នាំ២០២៤ ស្តីពីចំណាត់ការលើសំណុំរឿងពាក់ព័ន្ធនឹងករណី ញុះញង់បង្កឱ្យមានភាពវឹកវរធ្ងន់ធ្ងរ ដល់សន្តិសុខសង្គម បានបញ្ជាក់ថា កាលពីថ្ងៃទី១៥ ខែកុម្ភៈ អយ្យការអមសាលាដំបូងខេត្តព្រះសីហនុ បានទទួលចាត់ការលើសំណុំរឿងព្រហ្មទណ្ឌ ពាក់ព័ន្ធនឹងករណី ញុះញង់បង្កឱ្យមានភាពវឹកវរធ្ងន់ធ្ងរ ដល់សន្តិសុខសង្គម ប្រព្រឹត្តដោយ ឈ្មោះ Chen Neng Chuan ភេទប្រុស អាយុ ៣១ឆ្នាំ និងឈ្មោះ Lu Tsu Hsien ភេទប្រុស អាយុ ៣៤ឆ្នាំ ជាជនជាតិចិនតៃវ៉ាន់។ បុគ្គលទាំងពីរនេះ បានចូលមកប្រទេសកម្ពុជា ក្នុងបំណងផលិតវីដេអូបំភ្លើសការពិត អំពីសកម្មភាពពាក់ព័ន្ធ នឹងការជួញដូរមនុស្ស ការបង្ខាំងធ្វើទារុណកម្ម អំពើចាប់រំលោភ និងការលក់សរីរាង្គមនុស្ស។
សេចក្តីប្រកាស របស់អ្នកនាំពាក្យដដែលនេះ ដដែលបន្តថា កាលពីថ្ងៃទី១២ ខែកុម្ភៈ ឆ្នាំ២០២៤ ស្ថិតនៅអគារមួយកន្លែង ក្នុងក្រុងព្រះសីហនុ បុគ្គលទាំងពីរខាងលើ បានថតសំដែង ផ្សាយផ្ទាល់ចេញពីគណនី Facebook ឈ្មោះ Wa An Xiao Ji ដែលមានសកម្មភាព ត្រូវបានសន្តិសុខចាប់ខ្លួន និងវាយដំ។ ហើយនៅថ្ងៃទី១៣ ខែកុម្ភៈ បុគ្គលទាំងពីរ ក៏បានថយសម្តែងផ្សាយផ្ទាល់សាជាថ្មីម្តងទៀត ចេញពីទីតាំងម្តុំ ឆាយណាថោន ស្ថិតក្នុងក្រុងព្រះសីហនុ ដែលមានសកម្មភាពរត់គេចខ្លួន មានការភ័យខ្លាច និងនិយាយជាភាសាចិនមានអត្ថន័យថា ខ្លួន ត្រូវបានគេតាមចាប់វាយធ្វើបាប និងស្រែកឱ្យគេជួយ។
សេចក្តីប្រកាសដដែលនេះ បញ្ជាក់ថា ក្រោយបានស្តាប់ចម្លើយ និងពិនិត្យភស្តុតាង តំណាងអយ្យការអមសាលាដំបូងខេត្តព្រះសីហនុ ក៏បានសម្រេចចោទប្រកាន់ និងបញ្ជូន ឈ្មោះ Chen Neng Chuan ភេទប្រុស អាយុ ៣១ឆ្នាំ និងឈ្មោះ Lu Tsu Hsien ភេទប្រុស អាយុ ៣៤ឆ្នាំ ជាជនជាតិចិន តៃវ៉ាន់ ទៅកាន់សាលាដំបូងខេត្តព្រះសីហនុ ដើម្បីជំនុំជម្រះ តាមនីតិវិធី នៃការបង្ហាញខ្លួនភ្លាម ពីបទញុះញង់បង្កឱ្យមានភាពវឹកវរធ្ងន់ធ្ងរ ដល់សន្តិសុខសង្គម ប្រព្រឹត្តនៅភូមិ៦ សង្កាត់លេខ៤ ក្រុង-ខេត្តព្រះសីហនុ កាលពីថ្ងៃទី១៣ ខែកុម្ភៈ ឆ្នាំ២០២៤។
ទាក់ទិនសំណុំរឿងនេះ កាលពីរសៀលថ្ងៃទី១៥ ខែកុម្ភៈ ស្នងការដ្ឋាននគរបាលខេត្តព្រះសីហនុ បានបើកធ្វើសន្និសីទកាសែត បង្ហាញមុខជនសង្ស័យជនជាតិចិនតៃវ៉ាន់ ចំនួន ២នាក់ ដែលត្រូវសមត្ថកិច្ច ចាប់ខ្លួន បន្ទាប់ពីពួកគេ បានផលិតមាតិកាវីដេអូឃ្លីប បង្ហោះតាមបណ្តាញរបស់ខ្លួន ដែលអាជ្ញាធរចាត់់ទុកថា បង្កឲ្យមានភាពវឹកវរធ្ងន់ធ្ងរដល់កិត្តិយសសង្គមកម្ពុជា ជាពិសេសប៉ះពាល់ដល់សន្តិសុខ និងសណ្តាប់ធ្នាប់ ខេត្តព្រះសីហនុ។
នៅចំពោះមុខក្រុមអ្នកសារព័ត៌មាន លោក គួច ចំរើន អភិបាលខេត្តព្រះសីហនុ មានប្រសាសន៍ថា ជនជាតិចិនតៃវ៉ាន់ទាំងពីរនាក់ ដែលសមត្ថកិច្ចចាប់ខ្លួននេះ គឺពួកគេបានប្រព្រឹត្តនូវអំពើញុះញង់ បង្កឲ្យមានស្ថានភាពវឹកវរធ្ងន់ធ្ងរដល់សន្តិសុខសង្គម ជាពិសេសប៉ះពាល់ដល់សុវត្ថិភាព នៃការរស់នៅរបស់ប្រជាពលរដ្ឋ ភ្ញៀវទេសចរ ក៏ដូចជាអ្នកវិនិយោគទុន ក្នុងខេត្តព្រះសីហនុ។ លោកបន្តថា ករណីនេះ សមត្ថកិច្ច នឹងបន្តនីតិវិធី តាមបទល្មើសជាក់ស្តែង ដែលជនសង្ស័យបានប្រព្រឹត្ត ពោលគឺបញ្ជូនសំណុំរឿងនេះ ទៅកាន់សាលាដំបូងខេត្តព្រះសីហនុ ផ្តន្ទាទោស។
លោក គួច ចំរើន ឲ្យដឹងដូច្នេះ រួចបញ្ជាក់បន្ថែមថា ករណីជនសង្ស័យទាំងពីរនាក់នេះ ទោះពួកគាត់មកថតសម្តែងជា វីដេអូឃ្លីបខ្លីៗក្តី ប៉ុន្តែការថតនេះ វាបានបង្កការភ័យខ្លាចទៅដល់សាធារណៈជន ភ្ញៀវទេសចរជាតិ-អន្តរជាតិ និងអ្នកវិនិយោគទុន ដែលពួកគាត់ មានបំណងចង់ចូលមកធ្វើវិនិយោគ ឬក៏ធ្វើទេសចរណ៍នៅក្នុងខេត្តព្រះសីហនុ ឬចូលមកទស្សនាប្រទេសកម្ពុជា គឺពួកគាត់ពិតជាមានការភ័យខ្លាច ពេលឃើញវីដេអូទាំងនោះ។
លោកបន្តថា ស្ថានភាពជាក់ស្តែងនៅខេត្តព្រះសីហនុ ជាបន្តបន្ទាប់មកនេះ គឺពុំដែលមានបុគ្គលរូបណាម្នាក់ រងផលប៉ះពាល់ដោយបញ្ហាសន្តិសុខនោះទេ។ លោកទទួលស្គាល់ នៅក្នុងសង្គមមួយទាំងមូលគឺពិតជាកើតមានបញ្ហាអសន្តិសុខខ្លះៗមែន ប៉ុន្តែវាមិនមានស្ថានភាពធ្ងន់ធ្ងរដូចអ្វី ដែលគេកំពុងតែបំប៉ោង បំភ្លៃ បំភ្លើស ខុសការពិត ពីក្រៅប្រទេស ចំពោះខេត្តព្រះសីហនុទេ។
ក្រោយបញ្ចប់ធ្វើសន្នសីទកាសែត ជនសង្ស័យជនជាតិចិនតៃវ៉ាន់ទាំងពីរនាក់ ត្រូវកម្លាំងជំនាញ នៃស្នងការដ្ឋាននគរបាលខេត្តព្រះសីហនុ បញ្ជូនសំណុំរឿងភ្លាមៗ ទៅកាន់សាលាដំបូងខេត្តព្រះសីហនុ ដើម្បីបន្តនីតិវិធី នៅរសៀលថ្ងៃទី១៥ ខែកុម្ភៈ ឆ្នាំ២០២៤។
សមត្ថកិច្ច បញ្ជាក់ថា ពេលឃាត់ខ្លួនជនជាតិចិនតៃវ៉ាន់ទាំងពីរនាក់ កម្លាំងជំនាញ បានដកហូតសម្ភារៈមួយចំនួនរួមមាន៖ ឯកសណ្ឋានយោធា ស្រោមមុខខ្មោច កាំភ្លើងជ័របាញ់ទឹក និងសម្ភារៈ សម្រាប់បម្រើឲ្យការថតវីដេអូ មួយចំនួនទៀត។
តាមរាយការណ៍សមត្ថកិច្ច ឲ្យដឹងថា ជនសង្ស័យជនជាតិចិនតៃវ៉ាន់ទាំង ០២នាក់ ត្រូវកម្លាំងជំនាញ ចុះស្រាវជ្រាវឃាត់ខ្លួន នៅក្នុងបន្ទប់សណ្ឋាគារមួយកន្លែង ស្ថិតក្នុងក្រុងព្រះសីហនុ ក្រោយពួកគេរួមគ្នា ផលិតវីដេអូក្លែងក្លាយ ដើម្បីទាក់ទាញការចាប់អារម្មណ៍ នៅលើបណ្ដាញសង្គមនានា ពិសេសបណ្ដាញសង្គម ហ្វេសប៊ុក (Facebook) និង តិកតុក (TikTok) ដែលមានអ្នកគាំទ្រចូលទស្សនា (View) ឬចុចឡាច (Like) រហូតដល់ជាង ៥លាននាក់។
វីដេអូដែលពួកគេផលិតនោះ មានដូចជា ផលិតធ្វើជាសកម្មភាពក្រុមឧក្រិដ្ឋជនចាប់បង្ខាំងមនុស្ស-ផលិតធ្វើជាខ្មោចលង នៅតាមសណ្ឋាគារ កាស៊ីណូ ឬទីតាំងផ្សេងៗ ក្នុងមូលដ្ឋានខេត្តព្រះសីហនុ។ តាមរយៈវីដេអូប្រឌិតនេះ សមត្ថកិច្ច ចាត់ទុកថា បានធ្វើឲ្យមហាជនមានការភ័យខ្លាច និងយល់ច្រឡំ ពិសេសអ្នករស់នៅក្រៅប្រទេស ខ្លាចមិនហ៊ានចូលមកកម្សាន្តខេត្តព្រះសីហនុ នាថ្ងៃខាងមុខទេ។ តែធាតុពិត មិនមានហេតុការណ៍អាក្រក់ៗ កើតឡើងដូចអ្នកផ្សព្វផ្សាយ ឬអ្នកផលិតមាតិកាវីដេអូទាំងនោះទេ៕ ដោយ៖ ដែន អយុធ្យា
