មន្ត្រីជំនាញ រកឃេីញទីតាំងកាប់រានដីព្រៃ យកដីធ្វេីកម្មសិទ្ធិខុសច្បាប់ជិត ២០០ហិកតា ក្នុងដែនជម្រកសត្វព្រៃកែវសីមា
ខេត្តមណ្ឌលគិរី ៖ អាជ្ញាធរមូលដ្ឋាន និងមន្ត្រីជំនាញ បានរកឃេីញទីតាំងកាប់រានដីព្រៃ ហ៊ុំព័ទ្ធយកដីធ្វេីកម្មសិទ្ធិខុសច្បាប់ជិត ២០០ហិកតា នៅក្នុងដែនជម្រកសត្វព្រៃកែវសីមា ត្រង់ចំណុចអូររមូង និងចំណុចទួលពង្រ ស្ថិតក្នុងភូមិពូគង់ ឃុំស្រែព្រះ ស្រុកកែវសីមា ខេត្តមណ្ឌលគិរី។
មន្ត្រីជំនាញឲ្យដឹងថា ការខូចខាតគម្របព្រៃឈើ ដែលបណ្តាលមកពីការកាប់រុករានដីព្រៃ នៅតំបន់ខាងលើ មានប្រមាណ ២០០ហិកតា។ ក្នុងនោះ ព្រៃល្បះប្រមាណ ១៧០ហិចតា និងព្រៃថ្មីប្រមាណ ៣០ហិចតា។
បច្ចុប្បន្ន មន្រ្តីជំនាញការិយាល័យដែនជម្រកសត្វព្រៃកែវសីមា បានចងក្រងសំណុំរឿងនេះ ទៅកាន់តុលាការ (ប្រភេទដីអញ្ញតជន) ចំនួន ០៤ទីតាំង ក្នុងទំហំផ្ទៃដី១១២ ហិចតា។ ក្នុងនោះ ប្រជាពលរដ្ឋ បានលួចអាស្រ័យផលដំណាំមានដូចជា៖ កៅស៊ូមានអាយុកាលចាប់ពី ០៨ខែ រហូតដល់អាយុ ៣ឆ្នាំ ដំណាំស្វាយចន្ទី ហើយភាគច្រើនជាប្រភេទដំណាំដំឡូងមី ។ ទីតាំងកាប់រុករានខាងលើ ស្ថិតក្នុងតំបន់អភិរក្ស នៃដែនជម្រកសត្វព្រៃកែវសីមា៕ ដោយ ៖ តាស្រុះ
