នគរបាលស្រុកព្រៃនប់ ចុះបង្ក្រាបរថយន្តបំពាក់ស៊ីផ្លេខុសបច្ចេកទេស ឬស៊ីផ្លេជាចង្វាក់ភ្លេង ឲ្យយុវជននិងកុមារ រាំងតាមដងផ្លូវ
ខេត្តព្រះសីហនុ ៖ ដោយអនុវត្តតាមបទបញ្ជា លោកឧត្តមសេនីយ៍ឯក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ កម្លាំងនគរបាលស្រុកព្រៃនប់ ខេត្តព្រះសីហនុ កាលពីថ្ងៃទី២០ ខែមីនា ឆ្នាំ២០២៤ បានឃាត់ថយន្តដឹកទំនិញ ឬរថយន្តធុនធំចំនួន ០២គ្រឿង ដែលបំពាក់ស៊ីផ្លេខុសបច្ចេកទេស និងតម្រូវឲ្យអ្នកបើកបរដោះ ស៊ីផ្លេនោះចេញ និងធ្វើកិច្ចសន្យាបញ្ឈប់ប្រើប្រាស់សុីផ្លេបែបនេះជាបន្តទៀត។
ផ្តើមពីបញ្ហានេះ លោកអធិការដ្ឋាននគរបាលស្រុកព្រៃនប់ ក៏បានអំនាវពាវដល់ម្ចាស់រថយន្តទាំងអស់ ដែលមានបំពាក់ស៊ីផ្លេខុសបច្ចេកទេសទាំងអស់ ត្រូវដោះចេញពីរថយន្ត របស់ខ្លួន ដើម្បីទប់ស្កាត់ភាពអនាធិបតេយ្យតាមដងផ្លូវ និងសណ្តាប់ធ្នាប់សាធារណៈ។
ព្រមជាមួយគ្នានេះ ក៏បានអំពាវនាវដល់យុវជន ប្អូនៗ ក្មួយៗ និងកុមារ ដែលធ្វើសកម្មភាព រាំលេងតាមដងផ្លូវ ទៅតាមចង្វាក់ស៊ីផ្លេ រថយន្តកន្លងមក ត្រូវបញ្ឈប់សកម្មភាព របស់ខ្លួនផងដែរ។
លោកអធិការស្រុកព្រៃនប់ បានស្នើដល់អ្នកបើករថយន្តធុនធំទាំងអស់ ត្រូវបញ្ឈប់ រាល់សកម្មភាពស៊ីផ្លេធ្វើជាចង្វាក់ភ្លេង ដើម្បីឲ្យយុវជន ឬក្មេងៗ រាំនៅតាមផ្លូវសាធារណៈតទៅទៀត ព្រោះនាំឲ្យបាត់បង់សណ្តាប់ធ្នាប់តាមដងផ្លូវ ផ្តើមដោយស៊ីផ្លេរថយន្តធំទាំងនោះ។ ជាពិសេស បង្ការទប់ស្កាត់គ្រោះថ្នាក់ចរាចរណ៍ ដែលអាចនឹងកើតមានឡើងជាយថាហេតុ៕
