សមត្ថកិច្ចខេត្តកំពង់ស្ពឺ ចាប់ជនដៃដល់ សម្លាប់ស្ត្រីពីរនាក់ម្ដាយនិងកូនតូច បានហើយ!
ខេត្តកំពង់ស្ពឺ ៖ សមត្ថកិច្ចនគរបាលខេត្តកំពង់ស្ពឺ បានឲ្យដឹងថា កម្លាំងជំនាញ បានចាប់ខ្លួនជនដៃដល់ ដែលធ្វើសកម្មភាពកាប់សម្លាប់ ស្ត្រីជា ម្ដាយ និងកូនតូច បណ្តាលឲ្យបាត់បង់ជីវិតទាំង ២នាក់ម្តាយកូន បានហើយកាលពីថ្ងៃទី២៧ ខែមិថុនា ឆ្នាំ២០២៣ ក្រោយជនល្មើសរូបនេះ បានរត់គេចទៅលាក់ខ្លួននៅលើភ្នំបានមួយយប់ ។ សមត្ថកិច្ចបញ្ជាក់ថា ជនសង្ស័យ និងជនរងគ្រោះ ត្រូវជាបងប្អូនជីដូនមួយគ្នា។
ករណីឃាត់ខ្លួនជនសង្ស័យរូបនេះ បានធ្វើឡើងនៅម៉ោង ១១ និង៣០នាទី ព្រឹកថ្ងៃទី ២៧ ខែមិថុនា នៅចំណុចភ្នំកក់ ស្ថិតក្នុងភូមិត្រពាំងឈូក ឃុំ កក់ ស្រុកប្រាសាទ ខេត្តកំពង់ស្ពឺ។
ជនដៃដល់មានឈ្មោះ ឡាយ ទ្រី ភេទប្រុស អាយុ ៣៣ឆ្នាំ រស់នៅភូមិត្រពាំងឈូក ឃុំកក់ ស្រុកបសេដ្ឋ ខេត្តកំពង់ស្ពឺ ជាមួយនឹងជនរងគ្រោះ ហើយក៏ត្រូវជាបងប្អូនជីដូនមួយ របស់ជនរងគ្រោះផងដែរ ។
នៅចំពោះមុខកម្លាំងសមត្ថកិច្ច ជនសង្ស័យ បានសារភាពថា ដើមហេតុឈានដល់រូបគេ យកកាំបិតកាប់សម្លាប់ ទៅលើជនរងគ្រោះពីរនាក់ម្ដាយនិងកូនតូច គឺព្រោះតែរឿងគំនុំ ឈ្លោះគ្នាកាលពីជាងមួយឆ្នាំមុន។
ទាក់ទិនករណីនេះ លោកវរសេនីយ៍ឯក ចន សុភីត អធិការនគរបាល ស្រុកបសេដ្ឋ បានឲ្យដឹងថា ពេលនេះសមត្ថកិច្ចជំនាញ បានកសាងសំណុំរឿងបញ្ជូនទៅកាន់ការិយាល័យជំនាញ ដើម្បីចាត់ការបន្តតាមនីតិវិធីច្បាប់។
សមត្ថកិច្ច បញ្ជាក់ថា ករណីឃាតកម្មនេះ បានបង្កឲ្យមានការភ្ញាក់ផ្អើលកើតឡើង នៅម៉ោង៧ព្រឹក ថ្ងៃទី២៦ ខែមិថុនា ឆ្នាំ២០២៣ នៅចំណុចភូមិ ត្រពាំងឈូក ឃុំកក់ ស្រុកបសេដ្ឋ ខេត្តកំពង់ស្ពឺ។
មន្ត្រីនគរបាលស្រុកបសេដ្ឋ ឲ្យដឹងថា ជនរងគ្រោះជាម្តាយឈ្មោះ ឈៀវ សុខ គឿ ន អាយុ ២៤ឆ្នាំ និង កូនស្រីអាយុ ១ខួប រស់នៅភូមិឃុំកើតហេតុខាងលើ មានប្តី ជាកម្មកររោងចក្រ។
មន្ត្រីនគរបាល ស្រុកបសេដ្ឋ បន្តថា ជនសង្ស័យ ក៏ជាអ្នកធ្លាប់ប្រើប្រាស់ថ្នាំញៀនផងដែរ៕
