បុរសចោរឆក់ម្នាក់នេះ ធ្លាប់ជាប់គុក៥ដងរួចមកហើយ មិនរាងចាល ចេញមកវិញបន្តឆក់កាបូបស្រីស្អាត ជាប់គុក៦ដងទាំងលើកនេះ
រាជធានីភ្នំពេញ ៖ បុរសម្នាក់ជាចោរឆក់ ដ៏សកម្មម្នាក់ រស់នៅក្នុងក្រុងភ្នំពេញ ឈ្មោះ ចាន់ សុខពៅ ធ្លាប់ជាប់គុកចំនួន ៥ដងរួចមកហើយ គិតចាប់តាំងពីឆ្នាំ២០១៤មក ពីបទល្មើសលួច និង ឆក់។
តាមដីកាបង្គាប់ របស់សាលាដំបូងរាជធានីភ្នំពេញ បញ្ជាក់ថា ជននេះ ត្រូវបានតុលាការ ចេញដីកាសម្រេចដាក់ពន្ធនាគារ នៅឆ្នាំ២០១៤ ហើយមុនពេលចូលគុកនៅឆ្នាំ២០១៤ ជននេះ ក៏ធ្លាប់ជាប់គុកម្ដងហើយ រយៈពេល ៦ខែ ហើយក៏ចេញមកវិញ រហូតដល់ឆ្នាំ២០១៦ ជននេះ ក៏ប្រព្រឹត្តរឿងដដែលៗ គឺលួច និងឆក់ ហើយក៏ត្រូវសមត្ថកិច្ចចាប់បាន និងបញ្ជូនទៅពន្ធនាគារម្ដងទៀត ។ ក្រោយចេញមកវិញ មិនបានប៉ុន្មានផង នៅខែកក្កដា ឆ្នាំ២០១៧ ជននេះ ត្រូវតុលាការកាត់ទោសឱ្យជាប់ពន្ធនាគារជាថ្មី ពីបទលួច។
បន្ទាប់មក ក្រោយចេញពីពន្ធនាគារ ជននេះ នៅតែមិនកែប្រែ ហើយបន្តប្រព្រឹត្តបទល្មើសដដែល ក្នុងឆ្នាំ២០១៩ ក៏ត្រូវសមត្ថកិច្ច ចាប់បញ្ជូនទៅពន្ធនាគារ នៅថ្ងៃទី២៩ ខែឧសភា ឆ្នាំ២០១៩ ពីបទលួចមានស្ថានទម្ងន់ទោស ឆក់កាបូបយួរដៃ ពីជនរងគ្រោះ។ បន្ទាប់ពីទទួលទោសរួច កាលពីពេលថ្មីៗនេះ ជននេះ ក៏បន្តឆក់កាបូបពីស្រីស្អាតម្នាក់ ជាតារាសម្ដែង ហើយក៏ត្រូវបានសមត្ថកិច្ចចាប់ខ្លួនបាន និង បញ្ជនទៅពន្ធធនាគារម្ដងទៀត៕
