សមត្ថកិច្ចខេត្តរតនគិរី ឃាត់ខ្លួនបុរសម្នាក់ ករណីលួចខ្សែដៃ ទូរស័ព្ទនិងលុយ
ខេត្តមណ្ឌលគិរី៖ សមត្ថកិច្ចខេត្តរតនគិរី បានឃាត់ខ្លួនបុរសម្នាក់ កាលពីថ្ងៃទី១០ ខែវិច្ឆិកា ឆ្នាំ២០២៣ ក្នុងករណីលួច(ខ្សែដៃ ទូរស័ព្ទ និងលុយខ្មែរ) របស់ក្មេងស្រីចំនួន ៣នាក់ នៅខេត្តមណ្ឌលគិរី។
សមត្ថកិច្ចឲ្យដឹងថា ជនសង្ស័យឈ្មោះ សួ ពិសិដ្ឋ ភេទប្រុស អាយុ ៥២ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅសព្វថ្ងៃភូមិ ជំពូវ័ន្ដ ខណ្ឌពោសែនជ័យ រាជធានីភ្នំពេញ។
មន្ត្រីនគបាលខេត្តរតនគិរី បានឃាត់ខ្លួន ក្រោយពីស្រ្តីវ័យក្មេងទាំង ៣នាក់ប្រទះឃេីញជនសង្ស័យ ហេីយប្តឹងសមត្ថកិច្ច ឲ្យជួយអន្តរាគមន៍ភ្លាមៗ។
ដំណេីរនៃរឿង៖ ក្មេងស្រីទាំង ៣នាក់មានមុខរបរជាអ្នករត់តុ អ្នកទាំង០៣ មានទីលំនៅភូមិអូរស្ពាន សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី ពួកគាត់រៀបរាប់ថា ពួកខ្លួនត្រូវបានជនមិនស្គាល់អត្តសញ្ញាណបបួលទៅញាំអី នៅផ្ទះសំណាក់ឈ្មោះ ម៉ាណែល តាមរយៈមេការ របស់ពួកខ្លួន។ លុះពេលទៅដល់ ជនសង្ស័យ បានអោយពួកខ្លួន ជួលបន្ទប់ផ្សេងៗគ្នា ស្រាប់តែមួយសន្ទុះក្រោយមកពួកខ្លួន ក៏បានបាត់ទ្រព្យសម្បត្តិសម្ភារៈមានតម្លៃមួយចំនួនរួមមាន៖
១- ទូរសព្ទដៃមួយគ្រឿង ម៉ាក iphone 13 Promax ពណ៌ខៀវ
២- លុយរៀលចំនួន ២៩០០០០៛ (ពីរសែនប្រាំបួនម៉ឺនរៀល)
៣- ខ្សែដៃចំនួន ០១ខ្សែ។
ក្រោយពីធ្វើសកម្មភាព លួចយកទ្រព្យសម្បត្តិ ជនសង្ស័យបានគេចខ្លួនបាត់តែម្ដង លុះនៅថ្ងៃទី០៩ ខែវិច្ឆិកា ឆ្នាំ២០២៣ ពួកគាត់ទាំង ៣នាក់ ក៏មកធ្វើការនៅខេត្តរតនគិរី ក៏ប្រទះឃេីញជនសង្ស័យ នៅខេត្តរតនគីរី ហេីយក៏ប្ដឹងរាយការណ៍ មកសមត្ថកិច្ចអោយជួយអន្តរាគមន៍ និងឃាត់ខ្លួនជនសង្ស័យខាងលេីតែម្តង។
បច្ចុប្បន្ន កម្លាំងជំនាញ នៃអធិការដ្ឋាននគរបាលក្រុងបានលុង បានប្រគល់ ជនសង្ស័យ ព្រមទាំងវត្ថុតាងខាងលើ ជូនអោយកម្លាំងជំនាញព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តមណ្ឌលគិរី និងកម្លាំងជំនាញ នៃអធិការដ្ឋាននគរបាលក្រុងសែនមនោរម្យ ដើម្បីចាត់ការនីតិវិធីច្បាប់៕