អាណាព្យាបាល ព្រួយបារម្ភជាថ្មីទៀត ខណៈសមត្ថកិច្ចចាប់ខ្លួន ក្រុមឧក្រិដ្ឋជន៥នាក់ លួចនាំចូលគ្រឿងញៀនជាង១តោន តាមលម្ហសមុទ្រ ខេត្តព្រះសីហនុ!
ខេត្តព្រះសីហនុ ៖ ប្រជាពលរដ្ឋ ក៏ដូចជាអាណាព្យាបាល រស់នៅខេត្តព្រះសីហនុ បង្ហាញការព្រួយបារម្ភជាថ្មីទៀត ចំពោះបទល្មើសជួញដូរគ្រឿងញៀន ដែលក្រុមឧក្រិដ្ឋជន លួចនាំចូលពីក្រៅប្រទេស ចូលតាមច្រកលម្ហសមុទ្រខេត្តព្រះសីហនុ បន្តកើតមានជាបន្តបន្ទាប់។
ការព្រួយបារម្ភនេះ បានកើតឡើង បន្ទាប់ពីកាលពីព្រឹកថ្ងៃទី២៤ ខែមករា ឆ្នាំ២០២៤ កម្លាំងជំនាញ នៃមន្ទីរប្រឆាំងគ្រឿងញៀនក្រសួងមហាផ្ទៃ បានបង្ហាញមុខឧក្រិដ្ឋជនគ្រឿងញៀនជនជាតិចិន ចំនួន ០៥នាក់ រួមជាមួយនឹងវត្ថុតាងសារជាតិញៀនជាង ១តោន ខណៈជនសង្ស័យ បម្រុងដឹកគ្រឿងញៀនទាំងនោះ ចេញពីទូកដឹកទំនិញមួយគ្រឿង ឡើងមកលើដីគោក ក្នុងមូលដ្ឋានស្រុកស្ទឹងហាវ ខេត្តព្រះសីហនុ។
ជនសង្ស័យទាំង០៥នាក់ ត្រូវបានកម្លាំងជំនាញ នៃមន្ទីរប្រឆាំងគ្រឿងញៀនក្រសួងមហាផ្ទៃ សហការជាមួយការិយាល័យប្រឆាំងគ្រឿងញៀន នៃស្នងការដ្ឋាននគរបាល ខេត្តព្រះសីហនុ និងកម្លាំងកងរាជអាវុធហត្ថ ខេត្តព្រះសីហនុ ក្រោមកិច្ចសហការប្រតិបត្តិការ វីរសេនាតូចការពារព្រំដែនទឹក លេខ២៤០ ចុះបង្ក្រាបកាលពីម៉ោង ២រំលងអាធ្រាត ឈានចូលថ្ងៃទី២២ ខែមករា ឆ្នាំ២០២៤ នៅចំណុចឃុំកំពេញ ស្រុកស្ទឹងហាវ ខេត្តព្រះសីហនុ។
សមត្ថកិច្ច មន្ទីរប្រឆាំងគ្រឿងញៀន បានឲ្យដឹងថា គ្រឿងញៀន ដែលកម្លាំងជំនាញ បង្ក្រាបបាន មានចំនួន ២៥ធុង ឬស្មើនឹង ១,០៨២.៥គីឡូក្រាម។ ក្នុងនោះគ្រឿងញៀនសុទ្ធ មានចំនួន ១,០២១.២គីឡូក្រាម និងសម្ភារមួយចំនួនទៀត។
ទាក់ទិនបញ្ហានេះ លោកឧត្តមសេនីយ៍ឯក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ មានប្រសាសន៍ថា «កម្លាំងជំនាញ របស់លោក ក៏បានចូលរួមសហការជាមួយ កម្លាំងមន្ទីរប្រឆាំងគ្រឿងញៀនផងដែរ ដើម្បីបង្ក្រាបបទល្មើសគ្រឿងញៀន ដែលក្រុមឧក្រិដ្ឋជន នាំចូលឆ្លងដែន តាមលម្ហសមុទ្រខេត្តព្រះសីហនុ កាលពីយប់ថ្ងៃទី២២ ខែមករា ពិតមែន។ ប៉ុន្តែបទល្មើសនេះ ខាងកម្លាំងជំនាញ មន្ទីរគ្រឿងញៀន ជាម្ចាស់ករណី និងជាអ្នកបន្តនីតិវិធីតាមផ្លូវច្បាប់។ ដោយខាង កម្លាំងជំនាញ នៃស្នងការដ្ឋាននគរបាលខេត្តព្រះសីហនុ គ្រាន់តែជាអ្នកចូលរួមសហការតែប៉ុណ្ណោះ»។
ចំណែក លោក ទូច ពលៈ ប្រធាននាយកដ្ឋាននគរបាលការពារព្រំដែនទឹក ក៏បានឲ្យដឹងដែរថា កម្លាំងជំនាញ របស់លោក ក៏បានចូលរួមសហការជាមួយ កម្លាំងជំនាញ មន្ទីរប្រឆាំងគ្រឿងញៀន ក្រសួងមហាផ្ទៃ ក្នុងការងារចុះបង្ក្រាបបទល្មើសញៀនញៀនឆ្លងដែន ខាងលើនេះដែរ។ ហើយលោក ក៏សុំមិនធ្វើអត្ថាធិប្បាយអ្វីទៀតដែរ ព្រោះករណីនេះ ខាងថ្នាក់ដឹកនាំ មន្ទីរប្រឆាំងគ្រឿងញៀន ដែលជាម្ចាស់ករណី បានបកស្រាយ ឬបើកធ្វើសន្នីសិទកាសែតរួចហើយ កាលពីព្រឹកថ្ងៃទី២៤ ខែមករា ឆ្នា២០២៤។
យ៉ាងណាក៏ដោយចុះ យោងតាមផេកផ្លូវការ របស់មន្ទីរប្រឆាំងគ្រឿងញៀន នៃក្រសួងមហាផ្ទៃ បានឲ្យដឹងថា ក្រោយឃាត់ខ្លួនជនសង្ស័យទាំង ០៥នាក់ សមត្ថកិច្ច ក៏បានបញ្ជូនទៅសាកសួរនៅមន្ទីរប្រឆាំងគ្រឿងញៀន។ ហើយបន្ទាប់មក ក៏បានបង្ហាញមុខជនសង្ស័យ ជនជាតិចិនទាំង ០៥នាក់ និងវត្ថុតាងជាសាធារណៈ នៅព្រឹកថ្ងៃទី២៤ ខែមករា មុននឹងបញ្ជូនខ្លួន ទៅកាន់សាលាដំបូងរាជធានី ដើម្បីចាត់ការតាមនីតិវិធីច្បាប់៕ ដែន អយុធ្យា