រដ្ឋបាលខេត្តត្បូងឃ្មុំ ប្រកាសចាត់វិធានការក្តៅ ចំពោះជនទាំងឡាយណា ចូលទន្ទ្រានកាប់រានដីព្រៃលិចទឹក យកធ្វើកម្មសិទ្ធិខុសច្បាប់
ខេត្តត្បូងឃ្មុំ ៖ រដ្ឋបាលខេត្តត្បូងឃ្មុំ ប្រកាសចាត់វិធានការក្តៅ តាមផ្លូវច្បាប់ ឲ្យបានធ្ងន់ធ្ងរ ទៅលើក្រុម ឬជនទាំងឡាយណា ដែលប៉ុនប៉ងចូលទន្ទ្រានកាប់រានដីព្រៃលិចទឹក មានទីតាំងស្តិតក្នុងភូមិសាស្ត្រស្រុកក្រូចឆ្មារ យកធ្វើកម្មសិទ្ធិខុសច្បាប់។
ដើម្បីទប់ស្កាត់បទល្មើសខាងលើនេះ ឲ្យមានប្រសិទ្ធិភាព រដ្ឋបាលខេត្តត្បូងឃ្មុំ ក៏បានបង្កើត ក្រុមការងារគណៈកម្មការទប់ស្កាត់ និងការឈូសឆាយទន្រ្ទានយកដីព្រៃលិចទឹក ស្ថិតក្នុងភូមិសាស្ត្រស្រុកក្រូចឆ្មារ ដើម្បីអនុវត្តការងារឲ្យមានប្រសិទ្ធភាព។ ហើយ គណៈកម្មការនេះ ដឹកនាំដោយ លោក សាំង សែន។
ជាក់ស្តែង នៅថ្ងៃទី០២ ខែកុម្ភៈ ឆ្នាំ២០២៤នេះ លោក សាំង សែន បានដឹកនាំក្រុមការងារ នាំយកអង្ករចំនួន ៤០០គីឡូក្រាម និងថវិកា របស់លោកអភិបាលខេត្ត ចំនួន ៨លានរៀល យកទៅផ្តល់ជូនកម្លាំងចម្រុះទាំង ៣ប្រភេទ ដែលកំពុងឈរជើងប្រចាំការការពារ ទប់ស្កាត់ជនខិតខូច ដែលមានមកកាប់ទន្ទ្រានតំបន់ព្រៃលិចទឹក នៅទីតាំងចំនួន ៤ ក្នុងភូមិសាស្ត្រស្រុកក្រូចឆ្មារ ខេត្តត្បូងឃ្មុំ។
នាឱកាសនោះ លោក សាំង សែន សមាជិកគណៈកម្មការ និងជាប្រធានការិយាល័យ ប្រជាពលរដ្ឋខេត្តត្បូងឃ្មុំ មានប្រសាសន៍ថា ដើម្បីការពារផលប្រយោជន៍រួម គឺ លោក ជាម ច័ន្ទសោភ័ណ អភិបាលខេត្តត្បូងឃ្មុំ បានដាក់ចេញវិធានការក្តៅ ដើម្បីទប់់ស្កាត់ជនខិលខួចទាំងឡាយណា ដែលមានបំណងចូលឈួសឆាយ រំលោភយកដីព្រៃលិចទឹក ស្ថិតក្នុងភូមិសាស្ត្រ ស្រុកក្រូចឆ្មារ យកធ្វើកម្មសិទ្ធិឯកជនខុសច្បាប់។ លោកបន្តថា ដើម្បីទប់ស្កាត់បទល្មើសនេះ រដ្ឋបាលខេត្ត បានដាក់កម្លាំងការពារប្រចាំការចំនួន ៤ ទីតាំង ធ្វើយ៉ាងណាទប់ស្កាត់បទល្មើសទាំងនេះ ឲ្យខាងតែបាន។
លោក សាំង សែន បញ្ជាក់បន្ថែថា ជាការលើកទឹកចិត្ត ចំពោះកងកម្លាំងឈរជើង នៅតាមគោលដៅនីមួយៗ គឺរដ្ឋបាលខេត្តបានរៀបចំអង្ករ និងថវិកា មួយចំនួនយកមកចែកជូន កងកម្លាំងទាំង ៣ប្រភេទ ដោយទីតាំងនីមួយៗ ទទួលបានអង្ករ និងថវិកា ២លានរៀល ជារៀងរាល់ខែ។
សូមបញ្ជាក់ថា កាលពីថ្ងៃសៅរ៍ ទី២៨ ខែមករា ឆ្នាំ២០២៤ រដ្ឋបាលខេត្ដត្បូងឃ្មុំ បានចេញសេចក្ដីជូនដំណឹង ស្ដីពីការទប់ស្កាត់ និងការឈូសឆាយទន្ទ្រានយកដីព្រៃលិចទឹក មានចំនួន ៩ឃុំ ក្នុងចំណោម ១២ឃុំ ស្ថិតក្នុងស្រុកក្រូចឆ្មារ ខេត្ដត្បូងឃ្មុំ និងបានរៀបចំកម្លាំងចម្រុះ ឲ្យឈរជើងល្បាតជាប្រចាំ នៅតាមបណ្តាទីតាំងសំខាន់ៗចំនួន ៤ រួមមាន៖
១- ឃុំក្របីក្រៀក (គ្រប់ដណ្តប់ ឃុំឈូក និងឃុំជំនីក
២- តំបន់ពស់អំបែង គ្រប់ដណ្តប់ឃុំទួលស្នួល
៣-តំបន់ចម្ការចិន គ្រប់ដណ្តប់ ឃុំ ប៉ើស១ ឃុំប៉ើស២ និងឃុំស្វាយឃ្លាំង
៤- តំបន់ខ្នងព្រែក គ្រប់ដណ្តប់ ឃុំក្រូចឆ្មារ ឃុំទ្រា និងឃុំព្រែកអាជី។
លោក សាំង សែន ឲ្យដឹងដូច្នេះ រួចបន្ថែមថា ប្រសិនបើមានបទល្មើសកើតឡើង នៅតាមគោលដៅនីមួយៗ គឺកងកម្លាំងប្រដាប់អាវុធទាំង ៣ប្រភេទ ដែលមានសមាសភាព ក្នុងមួយគោលដៅចំនួន ៧នាក់ គឺមានសិទ្ធិ ក្នុងការបង្ក្រាប និងចាប់ខ្លួន ជនល្មើសយកទៅអនុវត្តតាមនីតិវិធីច្បាប់។
ទន្ទឹមគ្នានេះ សម្រាប់អាជ្ញាធរមូលដ្ឋាន ក៏ត្រូវចូលរួមសហការទប់ស្កាត់ រាល់សកម្មភាព នៃការទន្ទ្រានកាន់កាប់ដីព្រៃ នៅក្នុងភូមិសាស្ត្រស្រុកក្រូចឆ្មារ ដើម្បីអភិរក្សធនធានធម្មជាតិ និងជីវសាស្ត្រចម្រុះនានា នៅតំបន់ព្រៃលិចទឹក ឱ្យបានគង់វង្ស ទុកសម្រាប់បម្រើ ជាឧត្តមប្រយោជន៍សាធារណៈ នាថ្ងៃអនាគត។
បន្ថែមលើនេះ ក្នុងនាមរដ្ឋបាលខេត្តត្បូងឃ្មុំ លោក សាំង សែន ក៏បានអំពាវនាវដល់ ប្រជាពលរដ្ឋទាំងអស់ ជាពិសេសប្រជាពលរដ្ឋ រស់នៅស្រុកក្រូចឆ្មារ សូមចូលរួមទប់ស្កាត់កបទល្មើសទន្ទ្រានកាប់ដីព្រៃលិចទឹក ឲ្យបានទាំងអស់គ្នា ដោយមិនត្រូវឆ្លៀតឳកាស ចូលទន្ទ្រានកាប់ដីព្រៃទាំងនោះ យកធ្វើជាកម្មសិទ្ធិទេ ព្រោះនឹងត្រូវប្រឈម សមត្ថកិច្ចចាប់ខ្លួន យកទៅផ្តន្ទាទោសតាមផ្លូវច្បាប់៕