លែងកូនក្តាមសេះ៥០ម៉ឺនកូន ក្នុងដែននេសាទសហគមន៍ទំនប់រលក ស្រុកស្ទឹងហាវ ដើម្បីបង្កើនផលស្តុកក្ដាមសេះ
ខេត្តព្រះសីហនុ ៖ មន្ត្រីជំនាញ នៃក្រសួងកសិកម្ម រុក្ខាប្រមាញ់ និងនេសាទ សហការជាមួយ មន្ត្រីជំនាញមន្ទីរស្ថាប័នពាក់ព័ន្ធ បានរួមគ្នា នាំយកកូនក្តាមសេះ ចំនួន ៥០ម៉ឺនកូន យកទៅលែងនៅតំបន់ដែននេសាទសហគមន៍ទំនប់រលក ស្ថិតក្នុងស្រុកស្ទឹងហាវ ដើម្បីអភិរក្ស និងបង្កើនផលស្តុកក្ដាមសេះ ក្នុងជម្រកធម្មជាតិ។
ពិធីនេះ ធ្វើឡើងកាលពីថ្ងៃទី០២ ខែកុម្ភៈ ឆ្នាំ២០២៤ ដោយមានការចូលរួមពីថ្នាក់ដឹកនាំក្រសួងកសិកម្ម មន្ត្រីមន្ទីរអង្គភាពពាក់ព័ន្ធ តំណាងសហគមន៍វារីវប្បកម្ម តំណាងអង្គការសម្ព័ន្ធសត្វព្រៃ និងធម្មជាតិ (WEA)។ កូនក្តាមសេះ ដែលមន្ត្រីជំនាញលែងនោះ គឺមានអាយុ ២០ថ្ងៃ និងមានចំនួន ៥០ម៉ឺនកូន។
មន្ត្រីមកពីក្រសួងកសិកម្ម បានឲ្យដឹងថា ពិធីលែងកូនក្តាមសេះនេះ រៀបចំឡើងដោយមជ្ឈមណ្ឌលស្រាវជ្រាវ និងអភិវឌ្ឍន៍វារីវប្បកម្មសមុទ្រ សហការជាមួយមន្ទីរកសិកម្ម និងខណ្ឌរដ្ឋបាលជលផល ខេត្តព្រះសីហនុ។ ហើយពិធីនេះ មានគោលបំណង ចូលរួមចំណែក ក្នុងការអភិរក្ស និងបង្កើនផលស្តុក ក្ដាមសេះ ក្នុងដែនជម្រកធម្មជាតិ។
មន្ត្រីជំនាញឲ្យដឹងថា ផ្អែកតាមលក្ខណៈបច្ចេកទេស បន្ទាប់ពីក្តាមសេះញី ដែលមានពងខាងក្រៅ ត្រូវយកមកថែរក្សា និងភ្ញាស់ បន្ទាប់មក យកទៅបំប៉ន ឲ្យក្លាយជាកូនក្តាមសេះ នៅមជ្ឈមណ្ឌលស្រាវជ្រាវ និងអភិវឌ្ឍន៍វារីវប្បកម្មសមុទ្រ នៃរដ្ឋបាលជលផល៕