កម្លាំងចម្រុះនឹងដាក់ប៉ុស្តិ៍ត្រួតពិនិត្យរាល់យប់ នៅតាមផ្លូវសំខាន់ៗក្នុងខេត្តព្រះសីហនុ ដើម្បីរកជាតិស្រវឹង គ្រឿងញៀន និងអាវុធជាតិផ្ទុះ
ខេត្តព្រះសីហនុ ៖ មន្ត្រីអ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ បានបង្ហោះសារនៅលើបណ្តាញសង្គមហ្វេសប៊ុកផ្លូវការ របស់លោក នៅព្រឹកថ្ងៃសៅរ៍ ទី០៣ ខែកុម្ភៈ ឆ្នាំ២០២៤នេះ ដើម្បីជាការជូនដំណឹងដល់ ប្រជាពលរដ្ឋ ជាពិសេសភ្ញៀវទេសចរជាតិ-អន្តរជាតិ ជាពិសេសអ្នកបើកបរយានយន្តគ្រប់ប្រភេទ ឲ្យបានជ្រាបថា ជារៀងរាល់យប់ កម្លាំងចម្រុះ របស់គណៈបញ្ជាការឯកភាព នៃរដ្ឋបាលខេត្ត រដ្ឋបាលក្រុង-ស្រុក ទូទាំងខេត្តព្រះសីហនុ នឹងត្រូវចុះប្រតិបត្តិការត្រួតពិនិត្យ សុវត្ថិភាព និងសន្តិសុខទូទៅ នៅតាមដងផ្លូវសំខាន់ៗមួយចំនួន ដោយផ្តោតលើការត្រួតពិនិត្យរកជាតិស្រវឹង ឬសារធាតុញៀន ត្រួតពិនិត្យរកអាវុធជាតិផ្ទុះ និងបទល្មើសផ្សេងៗ លើអ្នកបើកបរយានយន្តគ្រប់ប្រភេទ ដែលធ្វើដំណើរនៅតាមដងផ្លូវនានា។
មន្ត្រីនាំពាក្យដដែល បន្ថែមថា ក្នុងករណីរកឃើញ អ្នកបើកបរមានជាតិស្រវឹង សមត្ថកិច្ចជំនាញ នៅតាមគោលដៅនីមួយៗ នឹងឃាត់ខ្លួនអ្នកមានកំហុសឆ្គង ផាកពិន័យផង និងឃាត់មិនឲ្យបើកបរបន្តដំណើរទៅមុខទៀតទេ ក្នុងករណីរកឃើញស្រវឹងខ្លាំង ដោយតម្រូវឲ្យរកអ្នកបើកបរផ្សេង ដែលត្រូវជាសាច់ញាតិ ឬក្រុមការងារមកបើកម៉ូតូ ឬរថយន្តនោះជំនួសវិញ។
ដោយឡែក ចំពោះអ្នក រកឃើញមានសារធាតុញៀន សមត្ថកិច្ច នឹងឃាត់ខ្លួន ដើម្បីបន្តតាមនីតិវិធី។ ហើយ ក្នុងនោះ ចំពោះអ្នកប្រើប្រាស់សារធាតុញៀន នឹងត្រូវបញ្ជូនទៅមណ្ឌលអប់រំកែប្រែបន្សាបគ្រឿងញៀន។ រីឯ អ្នកជួញដូរសារធាតុញៀន ឬមានលាក់ទុកអាវុធជាតិផ្ទុះ ខុសច្បាប់ ក៏នឹងបញ្ជូនទៅកាន់តុលាការផ្តន្ទាទោសដែរ។
ផ្តើមពីបញ្ហានេះ ក្នុងនាមរដ្ឋបាលខេត្តព្រះសីហនុ សូមស្នើដល់ប្រជាពលរដ្ឋ ភ្ញៀវទេសចរ ក៏ដូចជាអ្នកបើកបរយានយន្ត គ្រប់ប្រភេទ ត្រូវចូលរួមសហការ ជាមួយ សមត្ថកិច្ច ដែលដាក់ប៉ុស្ត្តិ៍ត្រួតពិនិត្យ នៅគ្រប់គោលដៅនានា ដើម្បីរក្សាសុវត្ថិភាព និងសន្តិសុខសាធារណៈ ឲ្យមានប្រសិទ្ធភាព៕
