ពលរដ្ឋខេត្តព្រះសីហនុ បន្តព្រួយបារម្ភចំពោះបទល្មើសផ្សេងៗ ខណៈលោក ស រដ្ឋា ស្នងការនគរបាលខេត្តនេះ ប្តេជ្ញាពង្រឹងកម្លាំងចុះល្បាត និងដាក់ប៉ុស្តិ៍ត្រួតពិនិត្យ
ខេត្តព្រះសីហនុ ៖ អាណាព្យាបាលរស់នៅខេត្តព្រះសីហនុ បន្តព្រួយបារម្ភចំពោះបទល្មើសចោរឆក់ ចោរលួចគាស់ផ្ទះ បទល្មើសចោរកាត់ខ្សែរភ្លើង និងបទល្មើសចរាចរណ៍គ្រឿងញៀន បន្តធ្វើសកម្មភាពក្នុងមូលដ្ឋាននេះគួរឲ្យព្រួយបារម្ភ ជាពិសេសនៅតាមទីប្រជុំជន ក្នុងក្រុងព្រះសីហនុ ហើយគួរឲ្យមានកម្លាំងសមត្ថកិច្ច ចុះល្បាតឲ្យបានញឹកញាប់ជាងពេលមុន ចាប់ពីដើមឆ្នាំ២០២៤នេះតទៅ។
ត្រង់ចំណុចនេះ ទាំងប្រជាពលរដ្ឋ រស់នៅខេត្តព្រះសីហនុ ក៏ដូចជា ភ្ញៀវទេសចរជាតិ បានបន្តសំណូមពរដល់ លោក គួច ចំរើន អភិបាល នៃគណៈអភិបាលខេត្ត និងលោក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ ជួយចេញបទបញ្ជាក្តៅបន្ថែមទៀត ទៅកម្លាំងសមត្ថកិច្ចស្ថាប័នពាក់ព័ន្ធ នៅតាមក្រុង-ស្រុក-ក្រុង ក៏ដូចជាតាម ឃុំ-សង្កាត់ ឲ្យបន្តពង្រឹងសកម្មភាពចុះល្បាត នៅតាមទីតាំង ឬផ្លូវមានសភាពស្ងាត់ ជាពិសេសនៅពេលយប់ ដោយត្រូវពង្រាយកម្លាំងប្រចាំការ នៅតាមគោលដៅសំខាន់ៗ ដែលងាយកើតមានបទល្មើស នៅទាមភូមិសាសន៍នីមួយៗ ឲ្យបានជាប្រចាំ។
យ៉ាងណា ប្រជាពលរដ្ឋនៅតាមមូលដ្ឋានខ្លះ ក្នុងក្រុងព្រះសីហនុ បានអះអាងថា ជាបន្តបន្ទាប់មកនេះ គឺនៅពេលរាត្រីចូលមដល់ ពិសេសនៅពេលយប់ជ្រៅ ឬយប់ពាក់កណ្តាលអាធ្រាត្រ ហាក់មិនសូវឃើញមានវត្តមាន របស់កម្លាំងកងរាជអាវុធហត្ថ ឬកម្លាំងនគរបាល ចេញល្បាតនៅតាមផ្លូវ ឬទីតាំង ដែលងាយមានចោរកម្មលួចគាស់ផ្ទះ ចោរលួចកាត់ខ្សែរភ្លើង បទល្មើសជក់ ឬចរាចរណ៍គ្រឿងញៀន និងបទល្មើសផ្សេងៗ ឲ្យបានច្រើនទេ។ ហើយមានពេលខ្លះ ឃើញមានកម្លាំងសមត្ថកិច្ច នៅតាមស្ថាប័នខ្លះ បានចុះទៅដល់គោលដៅប្រចាំការ របស់ខ្លួន រួចបានថតបង្ហោះរូបភាព ឬរូបថតរបស់ខ្លួន បង្ហោះនៅតាមបណ្តាញសង្គមហ្វេសប៊ុក រួចក៏វិលត្រឡប់ ទៅកាន់គោលដៅផ្សេងៗ ដែលជាហេតុនាំឲ្យជនល្មើស អាចមានពេលបង្កបទល្មើសផ្សេងៗ នៅតាមទីតាំងមួយចំនួន។
ជាក់ស្តែងប្រជាពលរដ្ឋមួយចំនួន រស់នៅភូមិ១ សង្កាត់លេខ១ ក្រុង-ខេត្តព្រះសីហនុ បានអះអាងថា ផ្ទះរបស់គាត់ ត្រូវជនល្មើសលួចធ្វើសកម្មភាព ចូលគាស់ផ្ទះយកសម្ភារៈនៅពេលយប់ជាបន្តបន្ទាប់ ខណៈរូបគាត់ចេញទៅធ្វើការងារ ឬចេញទៅតាមបណ្តាខេត្តផ្សេងៗ ហើយមិនមានមនុស្សនៅផ្ទះ ក៏ត្រូវចោរចូលគាស់ផ្ទះលួចយកសម្ភារៈអស់គ្មានសល់ នៅចុងឆ្នាំ២០២៣។ ហើយសកម្មភាព របស់ក្រុមចោរលួចគាស់ផ្ទះចូលយកសម្ភារៈនេះ បានបន្តធ្វើសកម្មភាពជាបន្តបន្ទាប់នៅតាមផ្ទះពលរដ្ឋ ក្នុងមូលដ្ឋាននេះ បន្តរហូតមកដល់យប់ថ្ងៃទី០៤ ខែកុម្ភៈ ឆ្នាំ២០២៤នេះ។
ពលរដ្ឋ អះអាងថា ចំពោះសកម្មភាព បទល្មើសចោរលួចគាស់ផ្ទះយកសម្ភាៈ ចោរកាត់ខ្សែរភ្លើងនៅពេលយប់ និងក្រុមក្មេងទំនើងជក់គ្រឿងញៀន ក៏បានបន្តកើតមានស្ទើរជារៀងរាល់យប់ ប៉ុន្តែសមត្ថកិច្ច នៅតាមសង្កាត់ ក៏ដូចជាកម្លាំង នៃអធិការដ្ឋាននគរបាលក្រុងព្រះសីហនុ និងស្នងការនគរបាលខេត្តព្រះសីហនុ ហាក់មិនសូវពង្រាយកម្លាំងចុះល្បាត ឬឃាត់ខ្លួនជនសង្ស័យ ដែលប្រើប្រាស់មធ្យោបាយម៉ូតូរឺម៉ក ឬរថយន្តទ្រង់ ដឹកសម្ភារៈសំពីងសំពោងនៅពេលយប់ គួរឲ្យសង្ស័យ ដើម្បីត្រួតពិនិត្យ ឬសួរនាំ ឲ្យបានជាប្រចាំទេ។
ផ្តើមពីបញ្ហានេះ ក្រុមប្រជាពលរដ្ឋ មួយចំនួន រស់នៅតាមសង្កាត់ទាំង៤ ក្នុងក្រុងព្រះសីហនុ ជាពិសេសសង្កាត់លេខ១ សំណូមពរដល់ ថ្នាក់ដឹកនាំសមត្ថកិច្ចគ្រប់ស្ថាប័ន ជាពិសេស លោក គួច ចំរើន អភិបាល នៃគណៈអភិបាលខេត្តព្រះសីហនុ និងលោក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ ជួយពិនិត្យទៅលើសកម្មភាព របស់កម្លាំងសមត្ថកិច្ច នៅតាមឃុំ-សង្កាត់ និងក្រុង-ស្រុកនីមួយៗ ឲ្យពង្រឹងសកម្មភាពការងារចុះល្បាត របស់ខ្លួន ឲ្យបានជាប្រចាំ ដើម្បីទប់ស្កាត់បទល្មើស ចោរឆក់ ចោរលួចគាស់ផ្ទះ ចោរលួចកាត់ខ្សែរភ្លើង បទល្មើសគ្រឿងញៀន និងបទល្មើសផ្សេងទៀត ឲ្យមានប្រសិទ្ធភាព ប្រយោជន៍ផ្តល់សុវត្ថិភាព និងភាពកក់ក្តៅជូនប្រជាពលរដ្ឋ។
ទាក់ទិនបញ្ហានេះ សមត្ថកិច្ច នៃស្នងការរដ្ឋាននគរបាលខេត្តព្រះសីហនុ បានឲ្យដឹងថា កម្លាំងជំនាញ បានឃាត់ខ្លួនជនសង្ស័យធ្វើសកម្មភាពឆក់ បានចំនួន ១២នាក់ (ស្រី០១នាក់) កសាងសំណុំរឿងទៅកាន់តុលាការផ្តន្ទាទោស បន្ទាប់ពីជនសង្ស័យទាំងនោះ បានធ្វើសកម្មភាពឆក់ទូរស័ព្ទដៃ របស់ជនរងគ្រោះ កាលពីថ្ងៃទី២៩ ខែមករា ឆ្នាំ២០២៤ នៅក្បែររង្វង់មូល នៃទីប្រជុំជនវាលរេញ ស្រុកព្រៃនប់ ខេត្តព្រះសីហនុ ។
សកម្មភាពឃាត់ខ្លួនជនសង្ស័យខាងលើនេះ ក្រោមបញ្ជាពី លោកឧត្តមសេនីយ៍ឯក ស រដ្ឋា អគ្គស្នងការរង និងជាស្នងការនគរបាល ខេត្តព្រះសីហនុ និងសម្របសម្រួលនីតិវិធីពី លោក ពេញ ពិសិដ្ឋ ព្រះរាជអាជ្ញារង នៃអយ្យការអមសាលាដំបូង ខេត្តព្រះសីហនុ កម្លាំងការិយាល័យនគរបាលព្រហ្មទណ្ឌកម្រិតធ្ងន់ សហការជាមួយ កម្លាំងអធិការដ្ឋាននគរបាលស្រុកព្រៃនប់ ស្រុកកំពង់សិលា និងកម្លាំងប៉ុស្តិ៍នគរបាលរដ្ឋបាល ដឹកនាំផ្ទាល់ ដោយលោកឧត្តមសេនីយ៍ត្រី ណុប បញ្ញា ស្នងការរង ទទួលផែនការងារព្រហ្មទណ្ឌ បានស្រាវជ្រាវឈានដល់ឃាត់ខ្លួនជនសង្ស័យសរុបចំនួន ១២នាក់ (ស្រី០១នាក់) និងវត្ថុតាងមានម៉ូតូ ០៤គ្រឿង ក្បាំងម៉ូតូ ០២គូរ និងទូរស័ព្ទ ០៥គ្រឿង។
ក្នុងនោះចំពោះវត្ថុតាងម៉ូតូ ០១គ្រឿង ម៉ាក Honda Dream ពណ៌ស (គ្មានស្លាកលេខ) ដែលដកហូតបាន សមត្ថកិច្ចជំនាញការិយាល័យនគរបាល ព្រហ្មទណ្ឌកម្រិតធ្ងន់ បានធ្វើការប្រគល់ជូនជនរងគ្រោះ តាមការស្នើសុំ និងដោយមានការឯកភាពពី តំណាងអយ្យការ អមសាលាដំបូងខេត្ដព្រះសីហនុ។
ដោយឡែក ចំពោះជនសង្ស័យទាំង ១២នាក់ (ស្រី០១នាក់) ត្រូវកម្លាំងជំនាញការិយាល័យព្រហ្មទណ្ឌកម្រិតធ្ងន់ បានបំពេញនីតិវិធី បញ្ជូនសំណុំរឿង ទៅសាលាដំបូងខេត្ដព្រះសីហនុ ដើម្បីបន្តនីតិវិឌីតាមច្បាប់។
បន្ថែមលើនេះ ចំពោះមុខសញ្ញាចោរឆក់ផ្សេងទៀត ក៏ត្រូវកម្លាំងសមត្ថកិច្ច បន្តសហការជាមួយកម្លាំងស្ថាប័នជំនាញពាក់ព័ន្ធ ចុះស្រាវជ្រាវតាមនីតិវិធី ជាបន្តទៀត។
ទាក់ទិនបញ្ហានេះ លោក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ បានផ្តល់បទសម្ភាសន៍ឲ្យគេហទំព័រ «កម្ពុជាថ្ងៃនេះ» ដឹងកាលពីថ្ងៃទី២៥ ខែមករា ឆ្នាំ២០២៤ថា «ថ្មីៗនេះ ខ្ញុំ បានបញ្ជាឲ្យមន្ត្រីនគរបាល ជាពិសេសក្រុមល្បាត ចុះល្បាតឲ្យបានច្រើន និងញឹកញាប់ជាងពេលមុន។ ហើយក៏បានត្រៀមមធ្យោបាយម៉ូតូសម្រាប់ កម្លាំងសមត្ថកិច្ចចុះល្បាតចំនួន ៣០គ្រឿង ប៉ុន្តែម៉ូតូនេះ ខ្ញុំ មិនទាន់បានធ្វើពិធីចែកនៅឡើយទេ។ តែយ៉ាងណា ខ្ញុំ បានជម្រុញដល់កម្លាំងល្បាត ធ្វើយ៉ាងណាដឹកនាំកម្លាំងចុះល្បាតឲ្យបានច្រើន ជាពិសេស ពាក់ព័ន្ធជាមួយក្មេងទំនើង យើងក៏បានដឹងគោលដៅអស់ហើយៗ យើងក៏ជម្រាបជូនទៅមន្ត្រី របស់យើងឲ្យយកចិត្តទុកដាក់ ចំពោះទីតាំង ឬទីកន្លែងណា ដែលឧស្សាហ៍កើតមានរឿងរ៉ាវ ឬក៏បទល្មើសផ្សេងៗកើតឡើង»។
ចំពោះការឆ្លើយតប របស់លោក ស រដ្ឋា អគ្គស្នងការ និងជាស្នងការនគរបាលខេត្តព្រះសីហនុនេះ គឺទទួលបានការសាទរពីប្រជាពលរដ្ឋ ក៏ដូចជាអាណាព្យាបាលរស់នៅខេត្តព្រះសីហនុ ដោយពួកគាត់រំពឹងថា ក្រោយមានបទបញ្ជាក្តៅពី លោកស្នងការទើបមកទទួលតំណែងថ្មីនេះ រំពឹងថា បទល្មើសចោរឆក់ ចោរលួចគាស់ផ្ទះពេលយប់ ចោរកាត់ខ្សែរភ្លើង ក្មេងទំនើង និងបទល្មើសគ្រឿងញៀនជាដើម នឹងមានសញ្ញាថយចុះ នាថ្ងៃអនាគត៕
