សមត្ថកិច្ច ឃាត់ខ្លួនស្ត្រីម្នាក់ ពាក់ព័ន្ធការអូសទាញ ប្រមូលទិញគណនីធនាគារ អេ.ប៊ី.អេ (ABA) ពីប្រជាពលរដ្ឋ ដើម្បីលក់បន្តឲ្យបក្ខពួក
រាជធានីភ្នំពេញ ៖ សមត្ថកិច្ចនគរបាល រាជធានីភ្នំពេញ បានឲ្យដឹងថា បន្ទាប់ពីទទួលបាន បណ្តឹងពីជនរងគ្រោះ ពាក់ព័ន្ធជនមិនស្គាល់អត្តសញ្ញាណ បានលួចប្រើប្រាស់ប្រព័ន្ធទំនាក់ទំនងសង្គម (Telegram) ធ្វើការឆបោកប្រាក់ ដោយប្រើមធ្យោបាយ តាមរយៈការផ្ទេរប្រាក់ ចូលគណនី ABA រួចមក។ ទើបនៅថ្ងៃទី៣១ ខែមករា ឆ្នាំ២០២៤ ដោយមានការឯកភាពពី តំណាងអយ្យការអមសាលាដំបូង រាជធានីភ្នំពេញ នាយកដ្ឋានប្រឆាំងបទល្មើសបច្ចេកវិទ្យា ក៏ឈានទៅឃាត់ខ្លួនជនសង្ស័យម្នាក់ ឈ្មោះ ងួន ស្រីនាត ភេទស្រី អាយុ ២៧ឆ្នាំ ជនជាតិខ្មែរ ពាក់ព័ន្ធនឹងការអូសទាញ ប្រមូលទិញគណនីធនាគារ (ABA) ពីប្រជាពលរដ្ឋ ដើម្បីលក់បន្តឲ្យបក្សពួក។
បច្ចុប្បន្ន ជនសង្ស័យខាងលើ ត្រូវបាន នាយកដ្ឋានប្រឆាំងបទល្មើសបច្ចេកវិទ្យា កសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់។
ទន្ទឹមគ្នានេះ នាយកដ្ឋាន ប្រឆាំងបទល្មើសបច្ចេកវិទ្យា ក៏បានក្រើនរំលឹកដល់សាធារណជន ក៏ដូចជា ប្រជាពលរដ្ឋ ជាថ្មីទៀតថា ការប្រមូលទិញ ឬលក់គណនីកាត ATM ធនាគារ ទៅឲ្យបុគ្គលដទៃគ្រប់គ្រង វាជាអំពើខុសច្បាប់ ដោយបុគ្គលអ្នកលក់ និងអ្នកប្រមូលទិញ ក្លាយជាអ្នកចូលរួមប្រព្រឹត្តបទល្មើសដោយប្រយោលមិនដឹងខ្លួន នៅពេលជនទី៣ យកគណនីកាត ATM ធនាគារនោះ ធ្វើជាមធ្យោបាយ ដើម្បីទទួលផល នៃបទល្មើស ហើយនឹងត្រូវផ្តន្ទាទោស ដូចជនល្មើសផ្ទាល់ផងដែរ៕