គ្រោះថ្នាក់ចរាចរណ៍ ស្លាប់មនុស្សទៀតហើយ នៅខេត្តព្រះសីហនុ សូមអ្នកបើកបរប្រុងប្រយ័ត្ន
ក្រុងព្រះសីហនុ ៖ សមត្ថកិច្ចនគរបាលចរាចរណ៍ បានឲ្យដឹងថា គ្រោះថ្នាក់ចរាចរណ៍បានបណ្តាលឲ្យបុរសម្នាក់ ជាភាគីខាងម៉ូតូបានស្លាប់ភា្លមៗ នៅកន្លែងកើតហេតុ ក្រោយពេលមានរថយន្តមួយគ្រឿង បើកបរដោយជនជាតិចិន បានបើកបុក ជាមួយម៉ូតូ របស់ជនរងគ្រោះ នៅម្តុំមុខស្ថានីយ៍ប្រេងសាំង ភីធីធី (PTT) នៅម្តុំតោពីរ ស្ថិតក្នុងសង្កាត់លេខ៤ ក្រុង-ខេត្តព្រះសីហនុ នៅម៉ោងជាង ៣ជិតភ្លឺ ឈានចូលថ្ងៃទី១៨ ខែមីនា ឆ្នាំ២០២៤។
ក្រោយកើតហេតុ សមត្ថកិច្ច បានឃាត់ខ្លួន អ្នកបើកបរថយន្ត ជាជនជាតិចិន នាំយកទៅកាន់ការិយាល័យនគរបាលចរាចរណ៍ ដើម្បីរកដំណោះស្រាយតាមនីតិវិធីច្បាប់។
សមត្ថកិច្ចនគរបាលចរាចរណ៍ អំពាវនាវដល់អ្នកប្រើប្រាស់ផ្លូវ ឬអ្នកបើកបរយានយន្តគ្រប់ប្រភេទ ត្រូវចូលរួមគោរពច្បាប់ចរាចរណ៍ ឲ្យបានគ្រប់ពេលវេលា ឬប្រុងប្រយ័ត្នខ្ពស់ ក្នុងពេលបើកបរ៕
